Policia e komisariatit të Rinasit ka reaguar me shpejtësi në mbrojtje të ish-deputetit sociaslist Xhemal Qefalia, në lidhje me një video të publikuuar në media ku tregonte një sherr brutal në aeroport.
Më konkretisht, një grup personash, të dyshuar si nipa të Xhemal Qefalisë, u përleshën me grushte me punonjësit e sigurisë dhe policinë e aeroportit ndërkombëtar “Nënë Tereza”. Ngjarja ka ndohur më 6 shtator, në afërsi të “Gate 9”.
Por, Policia e Rinasit, në komunikatën e dhënë për mediat, kujdeset të thotë se protagonistët e sherrit nuk janë familjarë të ish-deputetit socialist Xhemal Qefalia.
Ndërkohë, raporton se asnjë prej personave që kanë dhunuar punonjësit e sigurisë dhe policinë e aeroportit ndërkombëtar “Nënë Tereza”, nuk është proceduar penalisht, pasi sipas organizatës së uniformave blu, ata kanë kërkuar falje.
Pra, me këtë argument të dhënë nga Policia, nëse ju godisni një efektiv për shkak të detyrës, mund të faleni pa u vendosur nën hetim, nëse kërkoni falje.
Komunikata e Policisë Kufitare të Policisë Rinas
“Në lidhje me një video të publikuar për një konflikt të ndodhur në ambientet e aeroportit të Rinasit, gjatë imbarkimit, sqarojmë se:
Më datën 06.09.2025, rreth orës 02.30, gjatë imbarkimit të pasagjerëve që udhëtonin me çarter në Antalia, disa prej tyre kanë debatuar me punonjësit e check in për çështje radhe, pasi kërkonin të kalonin bashkërisht dhe pa radhë, për shkak të fëmijëve të vegjël që kishin.
Nga stafi i aeroportit është kërkuar ndihma e policisë dhe pas ndërhyrjes së shërbimeve të Komisariatit të Policisë Rinas, konflikti është mbyllur.
Kryefamiljari, shtetasi A. M., dhe djemtë e tij, që po udhëtonin familjarisht (rreth 18 shtetas, familjarë bashkë me fëmijë të mitur) për pushime në Antalia, Turqi, u kanë kërkuar falje punonjësve, të cilët nuk kanë dashur të ushtrojnë të drejtën e ankimit dhe të vijonin më tej procedurat për këtë rast.
Duke parë reflektimin pozitiv të familjarëve dhe duke marrë parasysh faktin që kishin edhe fëmijë të mitur me vete, si dhe faktin që punonjësit nuk donin të bënin kallëzim, punonjësit e Policisë Kufitare të Rinasit i kanë këshilluar për moskryerje të veprimeve të tilla dhe i kanë lejuar të vijonin udhëtimin.
Sqarojmë faktin se pretendimet se personat e përfshirë në konflikt janë familjarë të shtetasit Xh. Q., nuk janë të vërteta.”
