Një valë protestash dhe greve pritet të përfshijë Francën, ku rreth 800,000 njerëz pritet të marrin pjesë në tubime për të kundërshtuar planet e qeverisë për shkurtime të buxhetit dhe ndryshime në sistemin e pensioneve, sipas agjencisë Reuters.
Kërkesat e protestuesve përfshijnë anulimin e planeve fiskale të qeverisë së mëparshme për të rritur shpenzimet për shërbimet publike dhe për të vendosur taksa shtesë për të pasurit. Gjithashtu, ata kërkojnë uljen e moshës së pensionit, duke argumentuar se aktualisht qytetarët detyrohen të punojnë më shumë për të arritur këtë status.
Në Paris, disa linja metroje pritet të pezullohen, ndërsa qindra nxënës kanë bllokuar hyrjet e disa shkollave. Një pankartë e ngritur nga një nxënës para shkollës Lycee Maurice Ravel thoshte:
“Bllokoni shkollën tuaj të mesme kundër masave shtrënguese.”
Edhe punonjësit e sektorit publik janë në krye të protestës. Gaetan Legay, mësues 33-vjeçar, tha:
“Jam këtu për të mbrojtur shërbimet publike.”
Qeveria e presidentit Emmanuel Macron dhe kryeministri i sapoemëruar Sebastien Lecornu janë nën presion, jo vetëm nga protestuesit, por edhe nga parlamenti dhe investitorët, të shqetësuar për deficitin e lartë të Francës.
Sindikatat kryesore të vendit deklaruan:
“Punëtorët që ne përfaqësojmë janë të zemëruar.”
Edhe sindikatat e fermerëve kanë bërë thirrje për mobilizim, duke shtuar presionin ndaj qeverisë. Deficiti buxhetor i Francës vitin e kaluar ishte pothuajse dyfish i tavanit prej 3% të BE-së, duke e bërë sfidë për Lecornu të mbledhë mbështetje parlamentare për buxhetin e vitit 2026.
Për të garantuar sigurinë, rreth 80,000 policë dhe xhandarë do të vendosen gjatë gjithë ditës. Njësitë e trazirave, dronë dhe automjete të blinduara do të jenë gjithashtu në gatishmëri.
