Mungesa e ujit të pijshëm po kthehet në një problem të përditshëm për banorët e Tiranës. Në Kashar e Babrru, shumë familje janë detyruar të kthehen te puset e oborreve, pasi furnizimi nga rrjeti i Ndërmarrjes së Ujësjellës-Kanalizimeve (UKT) mungon prej dekadash.
“Jetoj në Kashar dhe nuk kemi fare ujë të pijshëm, madje ndihmoj edhe komshinjtë”, thotë një banor i zonës. Ndërsa një tjetër 70-vjeçar nga Babrruja tregon se që prej vitit 1998 mbështetet vetëm te pusi i shtëpisë.
Situata nuk është më e lehtë as në lagje të tjera të kryeqytetit. Në Allias, uji rrjeti vjen vetëm tre herë në ditë dhe qëndron rreth 1 orë e 30 minuta, duke mos i përmbushur nevojat bazë të familjeve.
Prej 11 ditësh, Tv Klan ka kërkuar publikimin e orareve të furnizimit nga UKT, por institucioni ka refuzuar t’i vërë ato në dispozicion. Zyrtarisht, UKT thotë se furnizimi varion nga 5 deri në 17 orë në ditë, por operatorët dhe banorët raportojnë se në shumë zona, si Kinostudio, uji nuk vjen më shumë se 1 orë e gjysmë në ditë.
Kriza ka prekur edhe rezidencat diplomatike. Ambasadorët e Bashkimit Europian, Spanjës, Austrisë, Suedisë, Rusisë, Japonisë, Katarit dhe vendeve të tjera, prej muajsh përballen me mungesën ekstreme të ujit në shtëpitë e tyre.
Përmes kanaleve zyrtare, ata kanë ngritur shqetësimet te UKT, e cila ka kthyer përgjigjen standarde se “po merren masa”. Sipas institucionit, rezidencave u takon vetëm 1 metër kub ujë në ditë, sasi që nuk mbulon as nevojat minimale.
Me rritjen e shpejtë demografike, Tirana po përballet çdo vit me një situatë gjithnjë e më të vështirë. Vetë UKT ka pranuar se këtë verë ka pasur më pak ujë se një vit më parë, ndërsa paralajmëron se furnizimi vitin e ardhshëm do të jetë edhe më i kufizuar./Tv Klan
