Prokuroria e Posaçme Kundër Korrupsionit dhe Krimit të Organizuar (SPAK) dje përfundoi hetimet paraprake dhe ka dërguar për gjykim dosjen penale në ngarkim të kryebashkiakut të Tiranës, Erion Veliaj, bashkëshortes së tij Ajola Xoxa, 7 biznesmenëve dhe 8 personave të tjerë, si dhe 12 kompani dhe OJF.
Gjyqtare e seancës paraprake është caktuar Etleva Deda. Veliaj akuzohet për 13 vepra penale, ndërsa bashkëshortja e tij për 12 vepra penale.
Mes të pandehurve të tjerë janë edhe ish-kryetarja e Komisionit të Ligjeve, Klotilda Bushka, si dhe biznesmenët Elman Abule, Gentian Sula, Fatmir Bektashi, Meriman Palushi, Shkëlqim Fusha, Sokol Kryeziu dhe Mirton Lika.
Hetimi i SPAK-ut ka zbuluar një sërë veprash penale, përfshirë korrupsionin, fshehjen e pasurisë dhe favorizimin e biznesmenëve në tendera dhe leje ndërtimi të dhëna nga Bashkia e Tiranës.
Aktualisht, Veliaj ndodhet në paraburgim në burgun e Durrësit. Ai u arrestua më 10 shkurt me urdhër të SPAK dhe masa e “arrestit me burg” është lënë në fuqi nga të tre shkallët e gjyqësorit.
