Kryeministrja italiane Giorgia Meloni është përballur me një pengesë të madhe në lidhje me marrëveshjen për emigrantët me Shqipërinë.
Gjykata e Kasacionit në Itali ka vënë në dyshim një dispozitë të dekretit qeveritar që lejonte rihapjen e qendrave të emigrantëve, përfshirë atë të Gjadërit në Shqipëri, raportojnë mediat italiane.
Sipas gjyqtarëve, një emigrant duhet të lirohet menjëherë nëse ndalimi i tij nuk verifikohet, duke sfiduar afatin 48-orësh të vendosur nga ministri i Brendshëm Matteo Piantedosi.
Çështja nisi pas ankesës së një emigranti, i cili u mbajt në qendrën e Barit pa verifikim të ligjshëm, gjë që u cilësua si shkelje e të drejtës për liri personale.
Gjykata theksoi se ligji i qeverisë është në kundërshtim me Kushtetutën italiane, Konventën Evropiane për të Drejtat e Njeriut dhe normat ndërkombëtare. Tani, çështja pritet të kalojë në Gjykatën Kushtetuese.
