Janë zbardhur detaje të reja nga atentati që tronditi mbrëmjen e djeshme qytetin e Shkodrës, ku u ekzekutua me armë zjarri 34-vjeçari Kristian Kola, nga autorë ende të paidentifikuar. Ngjarja ndodhi rreth orës 22:30, në një lokal tek kinema “Republika”, në lagjen “Vasil Shanto”.
Burime për mediat bëjnë me dije se 34-vjeçari rezulton pa precedent penal dhe grupi hetimor nuk e ka ende një pistë hetimi. Kristian Kola ka shkuar në lokal për të takuar një mikun e tij, ku ka qëndruar shumë pak bashkë më pas kanë dalë të dy prej andej.
Sapo ai ka dalë nga lokali, para tyre është shfaqur një me motor, me dy persona të maskuar me skafandra dhe të veshur me të zeza. Njëri prej tyre ka qenë në rolin e drejtuesit të motorit, ndërsa tjetri në rolin e atentatorit.
Motori është ndaluar për pak sekonda, ku autori ka qëlluar nga një distancë e afërt me një armë zjarri me silenciator në drjetim të 34-vjeçarit dhe më pas janë larguar drejt periferisë së qytetit. Kristian Kolën e kanë kapur plumbat në pjesën e gjoksit, duke i shkaktuar vdekjen e menjëhershme.
Pranë viktimës ka qenë dhe shoku i tij, por ai ka shpëtuar pa lëndime. Nisur nga këto detaje, janë ngritur dyshime se mund të kemi të bëjmë me vrasës profesionistës. Dyshohet se autorët e kanë mnbajtur nën vëzhgim shënjestrën, teksa nuk përjashtohet mundësia që të ketë patur edhe persona të tjerë në rolin e informatorit.
Policia ka dyshime se motorri me të cilin lëvizën autorët e kanë ndjekur para dy netësh në zonën e Bardhajve, por pa arritur që ta bllokojnë ndërsa është duke u verifikuar nëse është i njëjti apo jo, edhe pse hetuesit flasin për një tjetër motomjet në këtë ngjarje.
Policia ka ushtruar kontrolle gjatë natës në disa zona të Shkodrës dhe ka sekuestruar pamjet filmike të kamerave të sigurisë, por ende pa rezultat për identifikimin e autorëve.
Kristian Kola punonte në një kompani ndërtimi që e kishte së bashku me të atin, teksa mbetet ende mister pse ndaj tij u zbrazën breshëri plumbash. Së fundmi, firma e tyre po bënte shtrimin e pllakave në rikonstruksionin e kinemasë në Shkodër.
Viktima ishte një person që lëvizte lirshëm në Shkodër gjatë gjithë ditës dhe nuk ka patur precedent të mëparshëm kriminal. Para afro një viti e gjysëm viktima ka patur një konflikt për motive të dobëta, por atë konflikt e ka mbyllur dhe nuk qëndron si pistë hetimi për Policinë.
34-vjeçari ka qenë dy herë për periudha të shkurta jashtë Shqipërisë, por as atje nuk raportohet për përfshirjen e tij në ndonjë konflikt të mundshëm.
Njoftimi i Policisë:
Rreth orës 22:30, në lagjen “Vasil Shanto”, në rrethana ende të paqarta, dy shtetas ende të paidentifikuar dyshohet se kanë vrarë me armë zjarri shtetasin K. K., 34 vjeç, i cili ishte në ambientet e jashtme të një lokali.
Shërbimet e Policisë kanë shkuar menjëherë në vendngjarje, janë ngritur pika kontrolli në dalje të qytetit dhe vijojnë kontrollet në zonë e në ambiente të ndryshme, për kapjen e autorëve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave, dokumentimin ligjor, si dhe për identifikimin dhe kapjen e autorëve.
