Gjykata e Korçës ka dhënë ditën e sotme masat e sigurisë për 10 të arrestuarit për sherrin masiv të regjistruar mes dy grupimeve në një lokal, pranë parkut të qytetit mbrëmjen e 31 Gushtit, ku dy persona mbetën të plagosur me thikë.
Vetëm njërit prej tyre i është lënë në fuqi masa e sigurisë “arrest me burg”, i cili akuzohet se ka kryer plagosjet me thikë, ndërsa 9 të tjerët janë liruar nga burgu duke iu caktuar masa e sigurisë “detyrim paraqitje”.
Në burg ka mbetur shtetasi Dritan Pino, 54 vjeç, banues në Korçë, i akuzuar për veprat penale “Vrasja me dashje”, mbetur në tentativë, “Plagosja e rëndë me dashje”, “Plagosja e lehtë me dashje”, “Shkatërrimi i pronës”, “Deklarimi i rremë para oficerëve të policisë gjyqësore”, “Prishja e qetësisë publike” dhe “Prodhimi, mbajtja, blerja apo shitja pa leje e armëve të ftohta”.
Ndërkohë, me masë “detyrim paraqitje” janë shtetasit: Petrika Ropi, 28 vjeç, Ilir Shukulli, 51 vjeç, Rafail Kocaqi, 21 vjeç, Salvi Asllan, 21 vjeç, Mihal Zhidro, 31 vjeç, Serxhio Mema, 25 vjeç, Gersi Dervishi, 37 vjeç, Sotiraq Shkurti, 31 vjeç, dhe Kristi Lamçe 29 vjeç, të gjithë banues në Korçë, të akuzuar për veprat penale “Plagosja e rëndë me dashje”, “Plagosja e lehtë me dashje”, “Shkatërrimi i pronës”, “Deklarimi i rremë para oficerëve të policisë gjyqësore” dhe “Prishja e qetësisë publike”.
Të plagosur me thikë në këtë ngjarje mbetën shtetasit Sotira Shkurta dhe Mihal Zhidro, teksa vijon të jetë ende në kërkim shtetasi E. K., 38 vjeç, banues në Korçë, i dyshuar si i përfshirë në konflikt.
Blutë e Korçës proceduan penalisht në gjendje të lirë edhe pronarin e lokalit ku ndodhi sherri, shtetasin R. I., 45 vjeç, banues në Korçë, për veprën penale “Punësimi i paligjshëm”, pasi nga verifikimet rezultoi se kishte punonjës të paregjistruar në organet kompetente.
Një ditë më parë u publikuan edhe pamjet, ku në pak minuta sherri verbal mes dy grupeve është kthyer në një konfrontim fizik që ka degraduar deri në përdorimin e karrigeve të lokalit, shkopinje të bejsbollit, si edhe thikës.
Fillimisht shihen vetëm tre persona në konflikt, ku njëri prej tyre shtrihet në tokë dhe dhunohet me grushte. Edhe pse sherri duket se qetësohet për pak sekonda, më pas ai degradon edhe më keq, ku 54-vjeçari Dritan Pine plagos me thikë Sotiraq Shkurtën dhe Mihal Zhidron.
Në sherr përfshihen të gjithë personat e pranishëm, duke goditur edhe me karrige apo me shkopinj bejsbolli. Dyshohet se sherri ka nisur për motive banale.
