Kryeministri Edi Rama ka zgjedhur sërish të sulmojë një gjyqtar, këtë herë të cilin me përçmim e quan “gjykatësi Ligoraq”, për një vendim që sipas tij mbron një ndërtim pa leje mes pallateve në Tiranë.
Rama publikoi edhe një foto të lokalit në fjalë, duke thënë se në rast zjarri “kthehet në barrikadë vrastare, të pakapërcyeshme edhe për banorët edhe për zjarrfikësit”. Ai tha se vendimi për mosprishjen e këtij objekti do të ankimohet nga Ministria e Drejtësisë.
Në reagimin e tij, kreu i qeverisë u përgjigj edhe akuzave për “presion mbi drejtësinë”:
“Deklaratat kundër gjykatësve për ndërtimet pa leje nuk duhen ngatërruar me qëndrimin tonë të palëkundur në mbështetje të drejtësisë dhe institucioneve të saj, në luftën kundër korrupsionit, krimit të organizuar dhe lirive e të drejtave të njerëzve,” – shkruan Rama.
Sipas tij, gjyqtari Ligoraq ka vendosur “në pak minuta dhe pa praninë e palëve” që të mos hapet kalimi i mbyllur nga kjo ndërtese pa leje. Kryeministri theksoi se emri i tij, bashkë me atë të prokurores Gjeli dhe gjyqtarëve Balliu e Demiri, do t’i bashkohet dosjes që Ministria e Drejtësisë pritet t’i dërgojë organeve të kontrollit të gjyqësorit.
“Armiqtë e shtetit” me togë të zezë
Nuk është hera e parë që Rama sulmon gjyqtarë. Vetëm javët e fundit ai ka vënë në shënjestër gjyqtarin Klarent Demiri, gjyqtarin Hazbi Balliu dhe gjyqtaren Ëngjëllushe Tahiri. Në disa raste i ka quajtur “të pacipë”, në raste të tjera ka insinuar se “kanë marrë diçka nën dorë”.
