Deputeti i PD Gazment Bardhi ka reaguar në lidhje me kërcënimin e gazetarit Almer Toska nga ana e biznesmenit Julian Morina, pas publikimit të një investigimi të publikuar në Timoni.al.
Në një postim në Facebook, Bardhi ka dënuar kanosjen dhe shkruan se kërcënimet mafioze ndaj një gazetari për shkak të punës së tij, tregojnë se kemi të bëjmë me një shtet mafioz.
Po ashtu ai më tej i ka bërë thirrje prokurorisë që të veprojë në mbrojtje të të drejtave të gazetarëve, duke dënuar me forcë këtë akt dhe çdo akt që synon të shuajë zërin e tyre
“Një shtet që lejon kërcënimet mafioze ndaj një gazetari për shkak të punës së tij nuk është as më shumë dhe as më pak por një shtet mafioz! Dënoj me forcën më të madhe kanosjen e drejtpërdrejtë ndaj gazetarit Almer Toska.
I bëj thirrje urgjente prokurorisë të veprojë në mbrojtje të të drejtave të gazetarëve, duke dënuar me forcë këtë akt dhe çdo akt që synon të shuajë zërin e tyre. Gazetarët duhet të ndjehen të lirë në punën e tyre dhe askush nuk mund të guxojë t’i shantazhojë apo kërcënojë”, shkruan Bardhi në Facebook.
Lexo edhe:
SKANDALI/ Biznesmeni Jul Morina kërcënon gazetarin Almer Toska pas publikimit të investigimit
