Zëvendësja e Departamentit të Antikorrupsionit në Partinë Demokratike, Genta Vangjeli, ka ngritur shqetësime lidhur me situatën financiare të Air Albania, të cilën kryeministri e kishte shpallur më 20 qershor si “krenaria kombëtare” e vendit.
Ajo përmendje se linja direkte mes Tiranës dhe Lubjanës, e nisur me bujë nga Air Albania, u anulua më 20 gusht për shkak të vështirësive financiare.
Ajo theksoi se kompania, e themeluar në vitin 2018 me 10% pronësi shtetërore përmes Albcontrol, ka publikuar vetëm bilancin e vitit të parë dhe nuk ka dhënë më pas informacion mbi pasqyrat financiare. Mungojnë gjithashtu të dhëna për vendime gjyqësore dhe njoftime nga përmbarues privatë për detyrimet miliona euro të Air Albania ndaj palëve të treta, duke ngritur dyshime për krizën e thellë financiare të kompanisë.
Vangjeli përmendi edhe marrëveshjen që kompania ka lidhur që prej vitit 2020 me Drejtorinë e Përgjithshme të Shërbimeve Qeveritare për ofrimin e fluturimeve charter për kryeministrin. Ajo tha se opozita ka kërkuar transparencë dhe krijimin e një komisioni hetimor për këto udhëtime, por kërkesa u rrëzua nga mazhoranca.
Deklarata e plotë:
Më 20 Qershor Air Albania e shpallur nga KM Edi Rama si ‘krenaria kombëtare’ njoftoi nisjen e fluturimeve direkte mes Tiranës dhe Lubjanës, duke rilidhur Shqipërinë dhe Slloveninë pas disa vitesh.
Por dy muaj më pas, më 20 Gusht, mediat Sllovene informuan publikun se kompania i anuloi planet për këtë linjë për shkak të vështirësive financiare.
Dhe kjo nuk është aspak çudi.
Air Albania, themeluar në vitin 2018 me 10% pronësi shtetërore përmes Albcontrol ka dorëzuar në QKB vetëm bilancin e saj për vitin e parë të operimit (2018), më pas asnjë publikim lidhur me pasqyrat financiare të kësaj shoqërie.
Mungojnë gjithashtu të dhëna për vendime gjyqësore dhe njoftime zyrtare nga përmbarues privatë për detyrimin miliona euro të Air Albania kundrejt palëve të treta.
Kjo fshehje ngre dyshime për krizën e thellë financiare të kompanisë.
Ndërkohë, që prej 2020-s, Air Albania ka lidhur një marrëveshje bashkëpunimi me Drejtorinë e Përgjithshme të Shërbimeve Qeveritare për ofrimin e shërbimit të fluturimeve të posaçme charter për KM e RSH.
Opozita ka kërkuar transparencë dhe një komision hetimor për udhëtimet e Kryeministrit me charter, por kjo u rrëzua nga mazhoranca.
Sot kërkojmë që Kryeministri dhe kompania të japin përgjigje: a po shkon drejt falimentimit ‘krenaria kombëtare’ për shkak të shpenzimeve të papërballueshme që vijnë nga udhëtimet charter të Edi Ramës?
LEXO EDHE:
Air Albania në krizë financiare, anulon nisjen e fluturimeve me Slloveninë
