Anëtari i Këshillit Kombëtar të Partisë Demokratike, Ilir Alimehmeti, deklaroi se në shtator pritet të nisë një aksion i ri opozitar.
Në një intervistë për News24, ai tha se forumet e PD-së do të mblidhen për të diskutuar format e këtij aksioni, ndërsa vëmendja aktualisht është tek analiza e zgjedhjeve të 11 majit dhe raportimi i shkeljeve.
Sipas Alimehmetit, raporti i OSBE/ODIHR është një element i rëndësishëm që ende mungon, për shkak të vonesës në publikim. Ai shtoi se protestat mbeten një nga mjetet kryesore të opozitës në përballjen me qeverinë.
“T’i qëndrosh përballë një autokracie nuk e zgjidh dot në mënyra të tjera, në një kohë kur institucionet janë të kapura. Ajo që mbetet për njerëzit është rruga e protestave. Në një vend demokratik, protestat janë të ligjëruara. Mënyra si ato organizohen, mbetet për t’u diskutuar, por unë i shoh si një element kyç,” deklaroi Alimehmeti.
