Kryetari i Grupit Parlamentar të PD, Gazment Bardhi, ka publikuar të tjera pamje nga kamerat e Qendrave të Votimit në qarkun Fier. Sipas Bardhit, pamjet tregojnë komisionerë të Partisë Socialiste duke nxjerrë fletët e votimit nga kutia për të kontrolluar si kanë votuar qytetarët.
Bardhi shprehet se një gjë e tillë nuk ka ndodhur kurrë më parë në historinë e zgjedhjeve në vend dhe e cilëson si dhunim të fshehtësisë së votës. Ai i atribuon këto veprime, që sipas tij përbëjnë kontroll masiv të votës, urdhërit të Belinda Ballukut gjatë zgjedhjeve të 11 majit në qarkun Fier.
Pamjet i përkasin QV 2846, njësia administrative Tërbuf, Bashkia Divjakë, ku sipas Bardhit komisioneri i PS nxjerr fletën e votimit, kontrollon votën e qytetarit dhe më pas e rihedh në kuti. Ai thekson se këto veprime, përveçse një shkelje e mundshme penale, “kthejnë votimet në farsë dhe paracaktojnë rezultatin e zgjedhjeve”.
Postimi:
Episodi 6/ VOTIM I KONTROLLUAR = FARSË ELEKTORALE
Kurrë në historinë e zgjedhjeve nuk ka ndodhur kontrolli masiv i votës dhe dhunimi brutal i fshehtësisë së saj, siç ka ndodhur me urdhër kriminal të Belinda Ballukut në zgjedhjet e 11 Majit në qarkun Fier. Nuk iu mjafton vetëm qëndrimi mbi kokë ndërkohë që qytetarët votojnë në dhomën e fshehtë, por kontrollojnë fletët e votimit edhe pasi ato janë hedhur në kutinë e votimit.
Pamjet më poshtë i përkasin QV 2846, njësia administrative Tërbuf, Bashkia Divjakë, ku dallohet qartësisht komisioneri i PS që nxjerr fletën e votimit nga kutia, verifikon se si ka votuar qytetari dhe më pas e rihedh në kuti.
Dhunimi i fshehtësisë së votës përveçse një vepër penale që vijon të mbetet e pandëshkuar, është edhe akti më i shëmtuar që i kthen votimet në farsë, duke paracaktuar rezultatin e zgjedhjeve, përmes kontrollit masiv të votës me patronazhistë të shndërruar në terroristë elektoral.
