Në garën për të përforcuar skuadrat me lojtarët më të mirë, klubet kanë shpenzuar shifra marramendëse, duke vendosur rekorde të reja në tregun e merkatos.
Deri tani, ekipet e Premier League janë protagoniste absolute, pasi 8 nga 10 blerjet më të shtrenjta të kësaj vere do të zbarkojnë në kampionatin anglez për sezonin e ardhshëm.
Megjithatë, merkatoja nuk është mbyllur ende dhe pritet që javët e fundit të sjellin lëvizje të tjera të mëdha që mund të ndryshojnë renditjen e shifrave.
Këto janë 10 transferimet më të shtrenjta të verës deri më sot (11 gusht), të cilat kanë marrë vëmendjen e të gjithë botës së futbollit.
137 milionë €
Florian Wirtz (Liverpool)
Florian Wirtz është bërë blerja më e shtrenjtë e merkatos verore deri më tani, pas kalimit nga Bayer Leverkusen te Liverpool për 137.5 milionë euro (117.5 milionë fikse + deri në 20 milionë bonuse). Mesfushori ofensiv gjerman, 22 vjeç, i konsideruar një nga talentet më premtues në botë, ka firmosur kontratë deri në vitin 2030.
95 milionë €
Hugo Ekitiké (Liverpool)
Blerja e dytë më e shtrenjtë e verës është Hugo Ekitiké, që la Eintracht Frankfurt për t’u bërë sulmuesi i ri i Liverpool-it. Klubi anglez ka paguar 95 milionë euro me bonuse për francezin 23-vjeçar, i cili ka nënshkruar deri në vitin 2031. Ai sjell shpejtësi, lëvizshmëri dhe depërtim, larg profilit klasik të një “numri 9”.
85 milionë €
Benjamin Sesko (Manchester United)
Manchester United ka bërë një goditje të madhe duke transferuar Benjamin Sesko nga RB Leipzig për rreth 85 milionë euro (fikse + bonuse). Sulmuesi slloven, 22 vjeç, ka firmosur me “reds”, pas një gare të fortë me Newcastle. Sezonin e kaluar shënoi 21 gola dhe dha 6 asistime në 45 ndeshje, përfshirë 4 gola në Champions League.
81 milionë €
Bryan Mbeumo (Manchester United)
Manchester United ka paguar 81 milionë euro (70 milionë fikse + 11 milionë bonuse) për të marrë Bryan Mbeumo nga Brentford. Sulmuesi anësor 25-vjeçar ka firmosur deri në vitin 2030. Ai vjen pas një sezoni spektakolar me 20 gola në Premier League.
76 milionë €
Viktor Gyökeres (Arsenal)
Pas negociatave të gjata, Viktor Gyökeres u bashkua me Arsenalin nga Sporting i Portugalisë për 76 milionë euro (65.7 milionë fikse + 10.2 milionë bonuse). Sulmuesi 27-vjeçar suedez ka firmosur për 5 sezone dhe do të mbajë fanellën me numrin 14.
75 milionë €
Luis Díaz (Bayern Munich)
Bayern Munich fitoi garën me Barcelonën për Luis Díaz, duke paguar 75 milionë euro te Liverpool-i. Sulmuesi kolumbian, 28 vjeç, ka firmosur deri në vitin 2029 dhe do të mbajë numrin 14.
74.2 milionë €
Matheus Cunha (Manchester United)
Manchester United ka paguar 74.2 milionë euro për Matheus Cunha te Wolverhampton. Sulmuesi 25-vjeçar brazilian ka firmosur kontratë 5-vjeçare.
70 milionë €
Martín Zubimendi (Arsenal)
Mesfushori spanjoll ka lënë Real Sociedad për 70 milionë euro, duke u bërë përforcim i rëndësishëm në projektin e Mikel Arteta.
70 milionë €
Mateo Retegui (Al Qadsiah)
Sulmuesi italo-argjentinas ka kaluar nga Atalanta te klubi saudit Al Qadsiah për 70 milionë euro, me një pagë vjetore prej rreth 20 milionë eurosh.
64 milionë €
Mohammed Kudus (Tottenham)
Tottenham ka paguar 64 milionë euro për ganezin Mohammed Kudus, të marrë nga West Ham. Sulmuesi 24-vjeçar ka firmosur për 6 sezone dhe do të jetë pjesë kyçe e projektit të Thomas Frank.
