Rreth një vit pas një grabitjeje të dhunshme në Alba Adriatica, policia italiane ka arrestuar në Rovigo një 38-vjeçar shqiptar, i akuzuar për tentativë vrasjeje dhe grabitje të rënduar.
Ngjarja ndodhi më 19 nëntor 2024, kur tre persona hynë me forcë në shtëpinë e një karabinieri, i cili tentoi të mbronte familjen e tij, përfshirë nënën e moshuar.
Oficeri i policisë u sulmua brutalisht me kazmë, duke pësuar plagë të rënda në fytyrë, trup dhe gjymtyrë. Ai iu nënshtrua një operacioni urgjent për shkak të hemorragjisë së brendshme dhe iu hoq shpretka. Ende sot, ai nuk është rikthyer në detyrë për shkak të gjendjes së rënduar shëndetësore.
Hetimet çuan tek shqiptari falë gjurmëve të ADN-së të lëna mbi një elektrik dore në vendin e ngjarjes. Emri i tij ishte i regjistruar më parë në databazat italiane, për shkak të një tjetër grabitjeje në një vilë në Castelnuovo Garfagnana (Lucca).
Edhe pse ishte ndaluar tri herë nga autoritetet në Rovigo, kishte arritur të shmangte arrestimin përmes përdorimit të një mbiemri të ndryshëm. Më në fund u lokalizua dhe u ndalua, dhe aktualisht ndodhet në burg në Veneto, në pritje të marrjes në pyetje javën e ardhshme.
Sipas prokurorit të çështjes në Teramo, Stefano Giovagnoni, 38-vjeçari dhe bashkëpunëtorët e tij janë të dyshuar si pjesë e një organizate kriminale të përfshirë në grabitje të shumta në banesa në mbarë Italinë.
Hetimet vazhdojnë për të identifikuar dhe kapur edhe dy anëtarët e tjerë të bandës.
