Një skandal është regjistruar në ndeshjen e kualifikuesve të Uefa Champions League mes Lech Poznan dhe Crvena Zvezdës së Beogradit, ku tifozët polakë kanë shpalosur banerin: “Kosova është Serbi”.
Skandali është më i rëndë për faktin se veprimi i tyre u përshëndet publikisht në të gjitha rrjetet sociale nga skuadra serbe, duke i falenderuar ata.
Ekipi serb fitoi 3 me 1 në transfertë, ndërsa pas lojës në faqen zyrtare në rrjetin social “X”, dikur Twitter, e postoi foton e banerit nacionalist duke shkruar në gjuhën polake “Faleminderit”.
Provokimet apo thirrjet antishqiptare në eventet e UEFA-s janë kthyer në diçka krejt normale, ku gjobat tashmë po duken qesharake, teksa kur vetë klubet ngatërrojnë politikën me sportin, atëherë duhet të merren edhe masa me përjashtime.
Nga ana tjetër Armand Duka, zv.president i UEFA-s i cili mund të ketë ndikim në vendimarrje të ndryshme duket i painteresuar mbi këtë çështje. Ai shpesh akuzohet se po përdor postin e tij në UEFA për interesa personale dhe që nuk përfaqëson më interesin e futbollit shqiptar, por po luan në tavolinën e lojtarëve të mëdhenj për të ruajtur privilegjet e tij.
Kjo heshtje e tij nuk është neutrale ajo mund të quhet dhe bashkëfajësi. Në vend që të protestojë kur mesazhe fyese ndaj shqiptarëve përhapen në stadiume evropiane, Duka është fokusuar më shumë në lobime politike për ngjarje si organizimi i Europianit në bashkëpunim me Serbinë, një vend ku nacionalizmi anti-shqiptar është ende i gjallë në tribunat sportive.
Dziękuję @LechPoznan!
⚪️ #fkcz pic.twitter.com/YO5nh0LoRH
— FK Crvena zvezda (@crvenazvezdafk) August 6, 2025
