Lefter Maliqi ka hedhur kritika të forta drejt drejtuesve politik të PD-së në Qarqe dhe kandidatëve të listës së mbyllur, të cilët i sheh si përgjegjës për hymbjen në zgjedhjet e 11 Majit, sidomos në Berat. Sipas tij, drejtuesit politik dhe kandidatët e listës së mbyllur, e shpërdoruan besimin që u dha Sali Berisha.
Maliqi deklaroi se ai duhet të ishte në listën e mbyllur për shkak të mbështetjes që ka, teksa akuzoi edhe për vjedhje votash brenda opozitës. Ai akuzoi drejtpërdrejt Enno Bozdon se mandati i tretë në Berat u humb për shkak të tij, pasi shkaktoi frymë përçarëse brenda opozitës.
Gjithashtu, Maliqi deklaroi se në shtator, Sali Berisha duhet të marrë vendime të forta, nga mosnjohja e zgjedhjeve, te protestat, braktisja e komisioneve parlamentare, por edhe riorganizimi i PD-së.
“Unë nuk i heq asnjë presje masakrës elektorale, por nga ana tjetër, që në daljet e para televizive dhe më pas, kam zë kritik edhe brenda kampit opozitar. Pra, përveç blerjes së votave, përdorimit të administratës, faljes së gjobave, dhënies nga 100 mijë lekë pensionistëve, bandat, apo edhe manipulimi i votave të emigrantëve. Por, nga ana tjetër, PD, si partia më e madhe, se unë isha drejtues politik i Partisë së Lirisë në Qarkun e Beratit dhe mora 5 mijë e 222 vota, pa u hapur kutitë. Se jam i bindur se një pjesë të votave të mia janë marrë nga brenda kampit opozitar, ashtu siç ka ndodhur edhe brenda kampit të majtë. Por KQZ-ja e famshme thoshte gabim njerëzor. Faktikisht janë për burg të githë numëruesit. Vetë sistemi zgjedhor është kriminal, jo vetëm për listat e mbyllura.
Në Qarkun e Beratit unë duhet të isha në listë të mbyllur për shkak të mbështetjes popullore, nga të majtë dhe të djathtë. Ndërkohë, për Bashkinë e Kuçovës vijoj ende betejën ligjore. Sali Berisha është në mision, por u dha besim të tepruar disa drejtuesve politik dhe disave në listat e mbyllura, të cilët e shpërdoruan besimin që ai u dha. Berisha nuk ka detyrim vetëm për këta 42 deputetë që dolën, se me gjithë koalicionin 50 deputetë. Por Berisha ka detyrim të jashtëzakonshëm, për ata qindra mijëra demokratë, të cilët qëndruar për 338 ditë poshtë ballkonit të tij. Ndërkohë, këta 42 deputetë të PD, mbi gjysma e tyre nuk e panë një herë atë dritare dhe kjo doli për shkak të listës së mbyllur.
Sali Berisha është në një mision, prandaj këtë mision duhet ta përmbushi me sukses, duke marrë vendime të forta, duke nisur nga mosnjohja e zgjedhjeve te protestat. Ata edhe mund të hyjnë në Kuvend, sa të betohen dhe të mos shkojnë më, deri sa të bllokohet jeta parlamentare. Krahas kësaj duhet dhe një riorganizim i PD-së. Që të fitosh një betejë, duhet të kesh një skuadër të mirë sa kundërshtari, ose më të fortë se kundërshtari. PD pati disa gabime, se në disa degë kishte mangësi në seksione, grupseksione apo edhe disa drejtues të degës apo Qarkut nuk punuan siç duhet.
Në Qarkun e Beratit ishte një frymë përçarëse brenda opozitës, madje mandati i tretë u dogj drejtpërdrejt nga drejtuesi i Qarkut të PD-së, i cili nuk krijoi frymën, nuk ndau detyrat dhe favorizonte vetëm disa kandidatë të caktuar. Qëllimi im nuk ka qenë të bëhem deputetë, por të bëhem drejtues lokal, se në Kuvend vetëm ngre zërin, por nuk u jep zgjidhje hallit të qytetarëve.” – tha Maliqi në Ora News.
