Greqia renditet ndër vendet e BE-së me numrin më të madh të bizneseve të vogla dhe të mesme në raport me popullsinë, por në të njëjtën kohë produktiviteti i tyre është më i ulëti në BE. Ky tipar problematik i ekonomisë greke, i theksuar herë pas here nga studime të ndryshme, citohet gjithashtu në Buletinin e Zhvillimeve Ekonomike të Alpha Bank, me të dhëna nga raporti vjetor i Komisionit Evropian mbi NVM-të.
Siç theksojnë analistët, produktiviteti i ulët është rezultat i përmasave shumë të vogla të ndërmarrjeve greke, si dhe faktit se ato operojnë në sektorë me njohuri dhe intensitet të ulët teknologjik. Prandaj, sfida është rritja e madhësisë së tyre, kalimi në sektorë të rinj dhe zgjerimi i investimeve në teknologji.
“Rritja e produktivitetit mund të vijë përmes investimeve në pajisje kapitale, të kombinuara me përmirësimin teknologjik dhe digjital që u përshpejtua pas shpërthimit të pandemisë. Për këtë qëllim, është thelbësore të përdoren mjetet e zhvillimit, si Fondi i Rimëkëmbjes, dhe të përmirësohet qasja e NVM-ve greke në kapital dhe financim,” thuhet në analizë.
Banka tregoi gjithashtu se NVM-të janë të pranishme në financimin e Fondit të Rimëkëmbjes: 265 kredi për këto biznese janë kontraktuar tashmë për një buxhet total prej 2.79 miliardë eurosh, ndërsa ato kanë marrë 1.4 miliardë euro nga subvencionet. Vitin e kaluar vetëm 52.4% e NVM-ve greke kishin të paktën një nivel bazë të intensitetit digjital, krahasuar me një mesatare prej 72.9% në BE, shifra që e vendosin Greqinë në vendin e fundit.
Ndërmarrjet e vogla dhe të mesme në Greqi përfaqësojnë 99.9% të totalit në sektorin jofinanciar, 84.7% të punësimit dhe 62.8% të vlerës së shtuar bruto reale. Sipas të dhënave të vitit 2024, për çdo 1,000 banorë, ka 79 NVM në Greqi, krahasuar me një mesatare prej 58 në BE.
“Pavarësisht krizave të njëpasnjëshme të viteve të fundit”, këto biznese janë forcuar si në numra absolutë ashtu edhe në aspektin e punësimit dhe prodhimit, ndërsa vlerësohet se tendenca rritëse do të vijojë në vitin 2025,” thuhet në raport.
