Bashkimi Evropian njoftoi të hënën se do të pezullojë për gjashtë muaj kundërmasat e planifikuara ndaj Shteteve të Bashkuara, të cilat ishin parashikuar të hynin në fuqi këtë javë, në përpjekje për të krijuar hapësirë për përparim në bisedimet tregtare me administratën e presidentit Donald Trump.
Sipas një deklarate të Komisionit Evropian, më 27 korrik, Presidentja Ursula von der Leyen dhe Presidenti amerikan Donald J. Trump arritën një marrëveshje politike mbi tarifat dhe tregtinë. Përfaqësuesi i Komisionit për tregtinë e përshkroi marrëveshjen si një hap për rivendosjen e stabilitetit dhe parashikueshmërisë në marrëdhëniet tregtare transatlantike.
“Duke pasur parasysh objektivat e dakorduara më 27 korrik, Komisioni do të ndërmarrë hapat e nevojshëm për të pezulluar për 6 muaj kundërmasat e BE-së ndaj SHBA-së, të cilat do të hynin në fuqi më 7 gusht,” thuhet në deklaratë.
Vendimi për pezullim vjen pas javësh negociatash intensive mes Trump dhe von der Leyen. Marrëveshja përfshin një sërë zotimesh të ndërsjella: SHBA do të mbajë në fuqi tarifat 15% për shumicën e produkteve evropiane, përfshirë makinat, ndërsa BE-ja ka pranuar të heqë tarifat për produktet industriale amerikane.
Sipas Shtëpisë së Bardhë, pjesë e marrëveshjes është edhe një angazhim i BE-së për të blerë energji amerikane në vlerë 750 miliardë dollarë dhe për të realizuar investime shtesë në SHBA në shumën 600 miliardë dollarë mbi nivelet aktuale.
Megjithatë, detajet e zbatimit të marrëveshjes mbeten të paqarta. BE-ja nuk ka kompetencë për të detyruar kompanitë private të blejnë energji ose produkte të caktuara nga SHBA, ndërsa vetë deklarata e BE-së nënvizon se marrëveshja e korrikut është një marrëveshje politike, jo ligjërisht e detyrueshme.
“Përveç masave të menjëhershme, BE-ja dhe SHBA-ja do të vijojnë negociatat për zbatimin e plotë të kësaj marrëveshjeje politike,” thuhet në deklaratën përfundimtare të BE-së.
