Një aksident ka ndodhur pasditen e kësaj të premte në aksin rrugor “Vau i Dejës–Bushat”, ku janë përfshirë dy mjete.
Sipas informacioneve paraprake, shtetasi M. K., duke drejtuar automjetin e tij, dyshohet se ka humbur kontrollin mbi drejtimin e mjetit dhe është përplasur me automjetin që drejtohej nga shtetasi R. S.
Si pasojë e përplasjes, është lënduar pasagjeri P. S., i cili ndodhej në automjetin e dytë. Ai është dërguar menjëherë për ndihmë mjekësore dhe ndodhet jashtë rrezikut për jetën.
Grupi hetimor ndodhet në vendngjarje dhe po punon për sqarimin e plotë të shkaqeve dhe rrethanave të aksidentit.
