Një 36-vjeçar hungarez është arrestuar nga Policia Kufitare në Pikën e Kalimit Kufitar Qafë Botë, pasi rezulton i shpallur në kërkim për një rast vjedhjeje të ndodhur më 28 korrik në Ksamil.
Sipas policisë, 36-vjeçari dyshohet se ka vjedhur një portofol që përmbante një shumë parash dhe karta bankare të një personi tjetër.
Po ashtu, ‘blutë’ bëjnë me dije se gjatë kontrollit të ushtruar në automjetin tip Volkswagen, në pronësi të shtetasit të ndaluar, u gjet dhe u sekuestrua edhe një pajisje përforcuese metalike grushti (boks), e ndaluar me ligj.
“Në vijim të veprimeve hetimore lidhur me shpalljen në kërkim të një shtetasi hungarez, i cili më datë 28.07.2025, në Ksamil, dyshohet se ka vjedhur një portofol me një shumë parash dhe karta bankare të një shtetasi tjetër, specialistët për Hetimin e Krimeve në Komisariatin e Policisë Sarandë, në bashkëpunim me shërbimet e Policisë Kufitare në PKK Qafë Botë, gjatë tentativës për të dalë nga territori i Shqipërisë, ndaluan shtetasin:
S., 36 vjeç, banues në Hungari, i shpallur në kërkim për këtë ngjarje.
Gjatë kontrollit të ushtruar në automjetin tip Volkswagen, në pronësi të këtij shtetasi, u gjet dhe u sekuestrua një përforcues grushti metalik”, thuht në njoftimin e policisë.
Materialet për të dy rastet iu referuan Prokurorisë për veprime të mëtejshme procedurale.
