Prokuroria e Posaçme kundër Korrupsionit dhe Krimit të Organizuar (SPAK) ka dalë sot me një njoftim zyrtar për goditjen e një rrjeti ndërkombëtar të trafikut të drogës, i përbërë nga shtetas shqiptarë dhe të huaj, ku janë sekuestruar mbi 6 ton lëndë narkotike me një vlerë tregu prej 411 milionë eurosh.
Një nga emrat më të përfolur të operacionit është Ermir Ndreaj, sipërmarrës i njohur në Tiranë dhe Durrës, i cili zotëronte biznese luksoze si klubi “Cinco Cavalli” në Durrës, restoranti “Savoy Garden” në Tiranë dhe një klinikë estetike në kompleksin “Delijorgji”.
Ndreaj u arrestua mbrëmjen e së premtes, së bashku me vëllezërit Artur dhe Ervin Hoxhosmani, si dhe Ilir Lloshin, të cilët konsiderohen pjesë e një grupi të strukturuar kriminal, të përfshirë në trafik ndërkombëtar droge.
Emrat e tjerë në hetim dhe lidhjet me atentatet mafioze
SPAK njofton se krahas 4 të arrestuarve, dy persona të tjerë janë nën hetim në gjendje paraburgimi: Erion Alibej, i penduar i drejtësisë, dhe Plarent Dervishaj, i njohur për përfshirjen në atentatin ndaj ish-prokurorit Arjan Ndoj më 1 nëntor 2019. Të dyve u janë komunikuar akuza të reja për veprime brenda këtij rrjeti.
Një tjetër shtetas, D.P. (alias D.B., alias E.S.), është shpallur në kërkim ndërkombëtar dhe po punohet për lokalizimin e tij.
Hetimet janë ndihmuar nga dëshmia e Erion Alibejt, i cili përmes rrëfimeve të detajuara dhe komunikimeve të kapura në aplikacionin e enkriptuar Sky ECC, ndihmoi në identifikimin e të dyshuarve dhe strukturës së rrjetit kriminal.
Komunikimet zbuluan skema të sofistikuara të trafikimit të kokainës nga Amerika Latine (Kolumbi, Ekuador) drejt porteve të mëdha të Europës, si Rotterdam, Antwerp, Marseille, si dhe kalime tokësore drejt Britanisë përmes Kanalit të La Manshit.
Episodet e sekuestrimeve: Kokainë dhe hashash në disa shtete
Sipas të dhënave zyrtare, hetimi është konkretizuar përmes sekuestrimeve të drogës në disa shtete europiane gjatë viteve 2020–2021, përfshirë:
Spanjë (shkurt 2020) – 400 kg kokainë
Belgjikë (prill 2020) – 989 kg
Holandë (qershor 2020) – 2000 kg kokainë
Holandë (tetor 2020) – 1484 kg
Itali (Rimini, korrik 2020) – 275 kg hashash
Itali (Bari, mars 2021) – 400 kg hashash
Francë–Britani (prill 2020) – 250 kg
Algeciras, Spanjë – 1442 kg (nga të cilat 170 kg për llogari të grupit)
Sekuestro e pasurisë: para, makina, orë luksi dhe një skaf
Gjatë kontrolleve janë sekuestruar një sërë pasurish të dyshuara si të përfituara nga aktiviteti kriminal:
43,470 euro dhe 5,000 franga zvicerane
3 automjete luksoze, përfshirë Mercedes G-Class AMG
1 skaf luksoz i regjistruar në emër kompanie
3 armë zjarri, të sekuestruara në banesën e A. Hoxhosmanit
Ora Rolex dhe Richard Mille, bizhuteri, pajisje teknologjike dhe dokumente financiare
19 karta bankare ndërkombëtare, dokumente pronësie në disa shtete dhe leje drejtimi ndërkombëtare
Sipas SPAK, ky rrjet kishte një strukturë të ndarë në disa nivele, nga porositësit dhe financuesit që vepronin nga Dubai apo vendet e BE-së, te personat që siguronin transportin, logjistikën dhe komunikimin e fshehur përmes Sky ECC.
Grupi përdorte metoda të avancuara të fshehjes së drogës në kontenierë me banane, dru apo kakao, si dhe skema pagesash të padukshme përmes sistemit informal Hawala.
Njoftimi i SPAK:
Prokuroria e Posaçme kundër Korrupsionit dhe Krimit të Organizuar (Prokuroria e Posaçme), me vendimin e datës 15.05.2024, ka vendosur ndarjen e akteve nga procedimi penal nr. 184/1 i vitit 2021 dhe regjistrimin e procedimit penal nr. 184/3 i vitit 2024, ndaj 9 (nëntë) shtetasve të dyshuar: P. D., J. M., B. P., A. (alias D.,) Sh., R. Rr., G. (alias K., alias E.,) N., E. S., B. H., dhe J. P., për veprat penale të “Trafikimit të lëndëve narkotike” (neni 283/a/1 dhe neni 28/4), “Grupi i strukturuar kriminal” (neni 333/a), si dhe “Kryerja e veprave penale nga grupi i strukturuar kriminal” (neni 334) të Kodit Penal.
Në vijim të hetimeve, gjatë muajit korrik 2025, janë identifikuar dhe përfshirë në procedim edhe 6 (gjashtë) persona të tjerë: A. H., K. H., E.N., E. A., P.D. dhe I. Ll., të cilët dyshohen se janë përfshirë në disa episode të trafikimit të drogës. Edhe këta shtetas dyshohen për të njëjtat vepra penale në kuadër të një grupi të strukturuar kriminal.
Këto hetime janë realizuar në bashkëpunim me autoritetet Evropiane të drejtësisë, Byronë Kombëtare të Hetimit, si dhe gjatë fazës së ekzekutimit me strukturat e hetimit në Policinë e Shtetit.
Prokuroria e Posaçme ka paraqitur kërkesë për caktimin e masës së sigurimit personal ndaj 7 (shtatë) personave në hetim, kërkesë e cila është miratuar nga Gjykata e Posaçme e Shkallës së Parë për Korrupsionin dhe Krimin e Organizuar (Gjykata e Posaçme) me vendimin nr. 77, datë 25.07.2025, duke vendosur masën “arrest në burg”, bazuar në nenin 238 të Kodit të Procedurës Penale.
Vendimi u ekzekutua menjëherë në bashkëpunim me strukturat e Policisë së Shtetit. Më datë 25.07.2025 u bë e mundur arrestimi i gjashtë personave në hetim:
• A. H.
• K. H.
• E.N.
• E. A.
• P. D.
• I. Ll.
Gjatë ekzekutimit të masës së sigurisë, në banesën e shtetasit A. H. u gjetën dhe sekuestruan 3 armë zjarri të llojit pistoletë, të mbajtura pa leje, për të cilat është arrestuar në flagrancë.
Një prej të dyshuarve, shtetasi D. P. (alias D. B., alias E. S.), është shpallur në kërkim, dhe po punohet për lokalizimin dhe kapjen e tij në bashkëpunim me Policinë e Shtetit dhe partnerët ndërkombëtarë. Për interesat e hetimit, Prokuroria e Posaçme ka kërkuar dhe marrë miratimin e Gjykatës së Posaçme për kryerjen e kontrolleve në banesa, automjete dhe persona.
Deri në këto momente janë ekzekutuar 5 vendime të Gjykatës së Posaçme, dhe janë realizuar kontrolle të shumta, nga të cilat ndër të tjera janë sekuestruar sende dhe materialet e mëposhtme:
• Shuma monetare në total:
• Euro: 43,470 €
• Franga zvicerane: 5,000 CHF
• Automjete:
• 3 automjete, përfshirë një Mercedes Benz AMG G63, një Volkswagen Golf 7a, dhe një Volkswagen Sharan.
• Mjet lundrues:
• 1 skaf luksoz i markës “Hull Works Sarock 40”, prodhim i vitit 2025, i regjistruar në emër të një subjekti tregtar.
• Armë zjarri:
• 3 pistoleta, me krehër dhe fishekë.
• Ora të luksit:
• 1 orë Rolex, model 126613LN
• 1 orë Richard Mille, model Mclaren RM50-03/68
• Telefona celularë:
• 16 aparate celularë, kryesisht të markës iPhone dhe Samsung, disa me karta SIM aktive.
• Karta bankare dhe dokumente financiare:
• 19 karta bankare ndërkombëtare (Visa, Mastercard, American Express), të lëshuara në emër të personave nën hetim.
• Dokumente bankare dhe transaksionesh financiare me llogari në Emiratet e Bashkuara, Gjermani, Itali dhe Panama.
• Pajisje elektronike:
• 1 dron i markës DJI Mavic 2 Enterprise, me të gjithë aksesorët përkatës.
• 8 hard disqe të markës Hikvision, me kapacitet 6TB secili.
• 1 NVR Hikvision.
• 2 radio komunikimi Baofeng.
• Dokumentacion identifikimi dhe pronësie:
• Patentë dhe karta identiteti nga autoritete të Shqipërisë, Gjermanisë, Italisë, Mbretërisë së Bashkuar.
• Leje drejtimi dhe dokumente lundrimi për mjetet lundruese.
• Certifikata pronësie, dokumente noteriale, kontrata shitblerjeje dhe deklarime të pasurisë.
• Etj.
Episodet të trafikut të drogës
Bazuar në informacionin hetimor të mbledhur nga Prokuroria e Posaçme, aktiviteti i këtij grupi të strukturuar kriminal për trafik ndërkombëtar të lëndëve narkotike është konkretizuar përmes një sërë episodesh të zhvilluara kryesisht gjatë periudhës 2020–2021 në disa shtete të Bashkimit Evropian dhe Mbretërinë e Bashkuar.
Episode të sekuestrimi të kokainës
1. Spanjë – shkurt 2020
Sekuestruar 400 kg.
2. Belgjikë – prill 2020
Sekuestruar 989.1 kg.
3. Kanali (Francë – Mbretëri e Bashkuar) – prill 2020
Sekuestruar 250 kg në një ngarkesë me destinacion Britaninë e Madhe.
4. Holandë – qershor 2020
Sekuestruar mbi 2000 kg kokainë. Vlera tregu e kësaj sasie llogaritet mbi 151 milionë euro (Burimi: https://www.ad.nl/rotterdam/douane-vindt-2020-kilo-cocaine-met-een-waarde-van-ruim-151-miljoen-euro-tussen-bananen )
5. Holandë – tetor 2020
Sekuestruar 1484.07 kg.
Episode të sekuestrimit të hashashit
6. Rimini, Itali – korrik 2020
Sekuestruar 275 kg.
7. Bari, Itali – mars 2021
Sekuestruar 400 kg.
8. Algeciras, Spanjë –mars-shtator 2020
Sekuestruar rreth 1442 kg, ku 170 kg dyshohet se ishin për llogari të të hetuarve.
Episode të tjera
9. Francë – shkurt 2020
Sekuestruar një automjet dhe 72,000 euro cash.
Modus Operandi
Ky grup i strukturuar kriminal vepronte nëpërmjet një organizimi të sofistikuar kryesisht në trafikimin e kokainës nga Amerika Latine drejt disa prej vendeve të Bashkimit Evropian si dhe në Britaninë e Madhe. Lënda narkotike vinte kryesisht nga Santa Marta (Kolumbi) ose Ekuadori dhe transportohej me kontejnerë detarë drejt porteve të mëdha si Anvers (Belgjikë), Rotterdam (Holandë), apo në rrugë tokësore drejt Francës dhe përmes Kanalit (Channel Tunnel) për në Mbretërinë e Bashkuar. Në disa raste, ngarkesat shkarkoheshin edhe në portet e Italisë dhe Spanjës.
Në qendër të trafikut të drogës, pronari i “Cinco Cavalli” Ermir Ndreaj në pranga
