Edi Rama ka ndërmarrë një aksion për lirimin e hapësirave publike të “zaptuara” nga bizneset, por përtej propagandës që raporton kryeministri në rrjetet sociale, realiteti në terren është tjetër.
Aksioni është selektiv, ku bizneset e “miqve” të pushtetit nuk preken, teksa kjo situatë u raportua pak ditë më parë edhe në media me zonën tek kompleksi “Delijorgji” në kryeqytet, ku një pjesë e restoranteve dhe lokaleve vijojnë të mbajnë të zaptuara trotuaret.
Kjo ka bërë që biznesmenët përfshihen në sherre të dhunshme ndaj njëri-tjetrit, më konkretisht, pronarët e barit “STOCKHOLM COFFEE & LOUNGE“, Ferhat dhe Olti Kaja, kanë dhunuar barbarisht pronarin e restorantit “Tokyo Bar & Snack”, Laert Kasaj.
Ngjarja ka ndodhur mbrëmjen e të hënës, rreth orës 22:30, në ambientet e kompleksit “Delijorgji”. Pamjet janë publikuar në rrjetet sociale, ku shihet se disa persona kanë dhunuar në grup Laert Kasajn, i cili pas kësaj ngjarje ka përfunduar në spital në gjendje të rëndë.
Në disa foto të publikuara në rrjet shihet se Policia ka shkuar në vendin e ngjarjes, pas sherrit të dhunshëm, por pas rreth 36 orë nga ngjarja, ende nuk kishte bërë asnjë komunikatë për mediat, duke e mbajtur të fshehtë.
Reagimi erdhi vetëm pasi sherri bëri bujë të madhe mediatike, ku Policia e Tiranës bën me dije se ka shpallur në kërkim dy vëllezërit Ferhat dhe Olti Kajën, të cilët janë identifikuar si autorë të dhunës barbare.
“Specialistët e Komisariatit të Policisë Nr. 2 shpallën në kërkim shtetasin Ferhat Kaja, 31 vjeç dhe Olti Kaja, 30 vjeç, pasi me datë 21.07.2025, rreth orës 22:30, në Rrugën e Kavajës, tek kompleksi “Delijorgji” dyshohet për motive të dobëta, në bashkëpunim me njëri-tjetrin, kanë goditur me grushte dyshohet dhe me sende të forta shtetasit E. K dhe Laert Kasaj, të cilët pas marrjes së asistencës mjekësore u larguan për në banesë. Punohet për kapjen e tyre dhe dokumentimin e plotë të rastit.” – njoftuan autoritetet.
SHKAKU I SHERRIT
Lokali “STOCKHOLM COFFEE & LOUNGE” i Ferhat dhe Olti Kajës është i pozicionuar përballë kompleksit “Delijorgji”, ndërsa restoranti “Tokyo Bar & Snack”, i Laert Kasajt ndodhet në brendësi të kompleksit.
Tre ditë më parë, Edi Rama publikoi një video në rrjetet sociale, ku tregonte se bizneset në zonën e kompleksit “Delijorgji” vijonin ende t’i kishin të zaptuara hapësirat publike, ku në fokus të video-s ishte edhe restoranti “Tokyo Bar & Snack”, i Laert Kasajt.
“Ka ende ngrehina që i rezistojnë më kot kërkesës për t’u shkulur vetë nga mexhelisi, se në fund të tëra do ikin po do ikin bashkë me një gjobë të kripur për ndërtuesin e pamirëkuptuar.” – shkruante Rama,.
Pas videos së Edi Ramës, u publikua edhe një denoncim në media ku tregonte bizneset në zonën e kompleksit “Delijorgji” dhe përballë tij vijon t”i mbanin të zaptuara trotuaret. Denoncimi niste me foton e lokalit “STOCKHOLM COFFEE & LOUNGE” të Ferhat dhe Olti Kajës, por pjesë e denoncimit ishte edhe restoranti “Tokyo Bar & Snack”, i Laert Kasajt.
Gjithsesi, referuar raportimeve mediatike, pronarët e lokalit “STOCKHOLM COFFEE & LOUNGE” dyshonin se pas këtij denoncimi në media qëndronte Laert Kasaj i “Tokyo Bar & Snack”, si dhe se ky i fundit i kishte denoncuar edhe tek Edi Rama.
Kjo dyshohet se ka qenë edhe arsyeja pse Ferhat Kaja së bashku me vëllain e tij Olti Kaja, e kanë pritur Laert Kasajn në momentin kur ka shkuar tek restoranti, duke e dhunuar barbarisht .
