Një ngjarje shqetësuese është regjistruar pasditen e së hënës në zonën e Brrylit në Tiranë, ku një i ri është ndaluar dhe më pas është arrestuar nga efektivët e Policisë së Shtetit, pasi dyshohet se kishte parkuar automjetin gabim.
Sipas dëshmitarëve, ndërhyrja e policisë ka qenë e ashpër, ndërsa i riu ka tentuar të filmojë me telefon momentin kur po i vendosej gjoba. Kjo ka acaruar një prej efektivëve të pranishëm, i cili ka ndërhyrë duke ia rrëmbyer telefonin nga dora me forcë. Pamjet e publikuara nga JOQ, tregojnë të riun teksa bërtet: “Më ke marrë telefonin, ma jep telefonin!”
Ngjarja ka ndodhur brenda pak minutash dhe është shoqëruar me tension, ndërsa qytetarët e pranishëm janë shprehur të indinjuar për mënyrën e sjelljes së policisë. Sipas tyre, i riu nuk bëri rezistencë, përveçse u përpoq të dokumentonte me video atë që po ndodhte.
Ngjarja ndodh vetëm pak ditë pas deklaratës së drejtorit të Përgjithshëm të Policisë së Shtetit, Ilir Proda, i cili paralajmëroi masa të ashpra ndaj parkimeve të dyfishta, përfshirë edhe ndjekje penale në raste kur ato bllokojnë rrugët e emergjencës apo rrezikojnë sigurinë publike.
Në këtë rast, megjithatë, duket se nuk ishin ambulancat që u bllokuan, por dora e efektivit që nuk donte të filmohej.
