Presidenti i Shteteve të Bashkuara, Donald Trump, ka deklaruar se është ftuar nga lideri kinez Xi Jinping për të vizituar Kinën dhe se kjo vizitë mund të zhvillohet në një të ardhme të afërt.
“Presidenti Xi më ka ftuar në Kinë dhe ndoshta do ta realizojmë këtë vizitë në një të ardhme jo shumë të largët”, tha Trump nga Zyra Ovale gjatë një takimi me presidentin e Filipineve, Ferdinand Marcos Jr.
Ai theksoi se ndonëse udhëtimi nuk është i menjëhershëm, nuk përjashtohet që të ndodhë shumë shpejt. “Na kanë ftuar shumë njerëz dhe do të marrim vendime së shpejti”, shtoi Trump.
Sipas agjencisë “Reuters”, ndihmës të Trumpit dhe homologut të tij kinez kanë diskutuar për një takim të mundshëm gjatë një udhëtimi të presidentit amerikan në Azi më vonë këtë vit, megjithatë, ende nuk ka një konfirmim zyrtar nga Uashingtoni apo Pekini.
Trump, i cili së fundmi ka tentuar të zbusë tensionet me Kinën, ka shprehur dëshirën për të arritur një marrëveshje të qëndrueshme tregtare mes dy vendeve. Aktualisht, mallrat kineze përballen me tarifa të larta deri në 55%, ndërsa presidenti amerikan ka propozuar një tarifë bazë prej 10% për të gjitha mallrat e huaja.
Ai ka vendosur si afat datën 12 gusht për finalizimin e një marrëveshjeje për tarifat mes dy fuqive ekonomike botërore.
