Dinamo projektohet si skuadra shqiptare me më shumë përqindje mundësi për kalimin në turin tjetër të Ligës së Konferencës. Këtë parashikim e bën superkompjuteri i “Football Meets Data”, që ka simuluar të gjitha sfidat e turit të dytë 10 mijë herë.
Dhe në të gjithë këto simulime, skuadra e Dinamos është ajo shqiptare me përqindjen më të madhe për të vazhduar më tej në sfidën me Atletik Klub D’Eskaldes, plot 76%.
Përveç saj janë edhe dy skuadra nga Superliga e Kosovës që kanë shanse të mëdha për kalimin e turit, pasi Ballkani projektohet me 67% për kualifikimin përballë Floriana dhe Prishtina me 57% përballë Larne.
Ndërkohë, Vllaznia projektohet me vetëm 31% mundësi që t’ia dalë përballë Vikingur të Reikjavikut, kurse Deçiç ka vetëm 12% mundësi për t’ia dalë përballë Rapid Vjenës.
Sa i përket shanseve të Egnatias, e cila ka kaluar në këtë turne pas eliminimit nga Liga e Kampioneve, ajo përllogaritet se ka 37% mundësi kalimi përballë Dinamo Minsk.
