Analisti Andi Bushati, i ftuar në emisionin “Të Paekspozuarit” në MCN TV, ka folur për task forcën e SPAK për zgjedhjet të cilën e konsideron të dështuar, ndërkohë që tha se SPAK i shërbeu Ramës duke goditur vetëm kundërshtarët e tij, ose ish bashkëpunëtorë që i kanë dalë kundër si Elvis Roshi.
“Dëgjova Klodin dhe Ergysin dhe duket sikur këmi të bëjmë me një pushtet, sikur jetojmë në demokraci dhe pushteti i drejtësisë është qeni roje që kontrollon pushtetin. Në fakt këto janë e njëjta gjë, prandaj nuk ka vlerë ky justifikimi që nuk e ndihmoi policia. Këta e dinin se ç’është policia, pse e ngritën task forcën me policinë? Apo Dumani në Janar kur tha do të bëjmë task forcë dhe do të bëjmë namin, kujtonte se kishte polici të mirë dhe tani kuptoi që kishte polici të keqe? Kjo u bë për të ngritur alibi të zgjedhjeve.
SPAK gjithmonë i ka shërbyer Edi Ramës, por këtë herë e bëri me çmimin e diskretitimit edhe për ata që kishin iluzion për SPAK-un. Këta janë të vegjël në numër, por jo të vegjël për të gjetur krim te Tom Doshi, Elvis Roshi që tradhtoi Ramën, apo kryetari i bashkisë së Vaut të Dejës që Rama e denoncon publikisht dhe i thotë po luan me dy porta. Menjëherë vërsulen zagarët e SPAK, që ti hapin çështje. Roshi mund të meritojë të jetë në burg, por SPAK merret se tradhtoi Ramën. Pra Rama ka mbajtur aq shumë kosto për Vis Roshin dhe tani që ky e tradhton, i vërsul SPAK. Në këtë kuptim janë qesharakë, sepse nuk na kanë zbardhur lobimin e McGonigal. Dolën në fushatë brenda ditës me deklaratë politike, që do të merremi me lobimin e PD. Pse? Për fushatë, se mediat e Ramës duhet të nxirrnin menjëherë që me këtë çështje, po merret SPAK. Pra, këtu nuk kam habi si u soll SPAK, por besoj se SPAK ka tradhtuar idiotët e dobishëm, që deri tani mundoheshin ta mbronin.
Argumenti i fundit që kam, është çështja Veliaj. Nëse këtyre që unë i quaj idiotët e dobishëm, i dha frymëmarrje Veliaj, sepse thuhej ja ç’bëri SPAK, goditi Ramën para zgjedhjeve duke i hequr kryetarin e Bashkisë së Tiranës. Tani zgjedhjet mbaruan. Argumenti i idiotëve të dobishëm se Ramës kjo do ti prishte punë ra, sepse tregoi që Rama mori një deputet më shumë, por minimum mori njësoj. Efekti Veliaj është zero”, tha ndër të tjera Bushati.
