Në kulmin e sezonit turistik, Sarandë është kthyer në një situatlë problematike sa i përket krimit, ndërkohë që Policia e këtij qyteti nuk është në krye të detyrës.
Persona të armatosur apo në kërkim lëviznin lirshëm në qytet, ndërkohë që vetëm rastësia mund të çojë në arrestimin e ndonjërit prej tyre. Po ashtu nuk mungojnë as plagosjet në sytë e qindra pushuesve, duke ndikuar negativisht në turizëm, nga frika e shkaktuar tek turistët.
Në krye të komisariatit të Sarandës qëndron prej dhjetorit të kaluar Gëzim Bashllari, i cili duket se ka dështuar në mbarëvajtjen e rendit dhe sigurisë.
Vetëm në pak ditë të këtij muaji janë regjistruar disa ngjarje të rëndë, ku protagonistët kanë qenë persona me rrezikshmëri të lartë.
Më konkretisht, më 8 Korrik, në kuadër të operacionit “Impact” u arrestua në Ksamil shtetasi kosovar Sh. M., 31 vjeç, banues në Gjilan. Gjatë kontrollit në automjetin tip “Range Rover” që drejtonte ky shtetas, uniformat blu gjetën të fshehur në çantën e tij të dorës, 1 armë zjarri pistoletë tip “Beretta”, me një krehër me fishekë.
Më 11 Korrik, Policia ndaloi rastësisht në rrugën “Butrinti” një automjet luksoz tip “Porsche Panamera”, brenda të cilit ndodheshin tre të rinj nga Kamza, një prej tyre i shpallur në kërkim. Më konkretisht shtetasit Endrit Doku (27 vjeç), Ervis Cukali (27 vjeç) dhe Imer Gega (21 vjeç). Endrit Doku ishte i armatosur me pistoletë, ku u hodh në det për t’i shpëtuar arrestimit bashkë me çantën ku kishte armën, por nuk ia doli dot, pasi u kap nga policia kufitare me skaf.
Ndërkohë Ervis Cukali, person me rrezikshmëri të lartë shoqërore, rezultonte në kërkim për veprat penale “Sigurimi i kushteve dhe i mjeteve materiale për të kryer vrasje” dhe “Mbajtja pa leje dhe prodhimi i armëve luftarake”, teksa u arrestua edhe për veprat penale “Mos kallëzimi i krimit” dhe “Veprime që pengojnë zbulimin e së vërtetës”. Ai ishte arrestua më 28 shtator të vitit 2023, së bashku me Albi Mecinin dhe Arafat Manërkollin, pasi u kapën me një sasi prej 21 kg eksploziv dhe dyshohet se do të kryenin në atentat në Fier.
Më 17 Korrik, dy grupe përplasen me armë zjarri në mes të ditës në lagjen numër 4, në sy të pushuesve. Të plagosur mbetën dy të rinjtë nga Kamza, Gëzim Hajdaraj 33 vjeç dhe Ernest Lama 24 vjeç, të cilët u dërguan tek Trauma për mjekim më të specializuar. Si autorë të krimit u shpallën dy vëllezërit Ramadan Zoto, i njohur edhe si Ramadan Canaj, 43 vjeç, si edhe Erjon Canaj, 36 vjeç. Në vendin e ngjarjes u gjet edhe një çantë, brenda së cilës kishte edhe një armë, e cila dyshohet se i përkiste njërit prej të plagosurve.
Ditën e djeshme, 19 Korrik, në Ksamil Albert Pashaj, pronari i “Euro Hotel” në Ksamil u dhunua me sende të forta (hunj) nga Agim Taraj (pronar i “Sunset Beach Bar”), Silvjan Sulku dhe Aldo Zeqiraj. Ngjarja ndodhi sërish në sy të qindra pushuesve, teksa pamjet me rrjedhjen e gjakut në fytyrë bënë xhiron e rrjetit.
Mbrëmjen e sotme, 20 Korrik, në Sarandë u regjistruan të shtëna me armë zjarri në lagjen numër 4, në rrugën “Mitat Hoxha”. Ngjarja ndodhi sërish në sytë e qindra pushuesve, duke vënë në rrezik dhe jetën e tyre. Gjatë konflikti, i plagosur mbeti ish-efektivi i Policisë, Adil Veli, 56 vjeç, i cili sipas autoriteve është goditur me tytën e armës së zjarrit pistoletë.
Policia në komunikatën për mediat e kishte me shumë rëndësi të thoshte se arma e zjarrit ishte shkrepur në mënyrë të pavullnetshme në ajër, gjatë konflikti. Nuk dihet se si doli në këtë konkluzion Policia, kur nuk dha asnjë inicial të autirit/ëve, por tha se po punon për identifikimin e tyre. Më shumë la përshtypjen e një tentative për të mbrojtur autorin.
Pra, në më pak se dy javë, në Sarandë kanë ndodhur 5 ngjarje të rënda dhe duket se qyteti i ish-kryepolicit Ardi Veliu dhe e kryepolicit aktual Ilir Proda, po thyen rekorde për krimin. Saranda është kthyer në skenë “kërcitje armësh”, përplasjesh, grushtesh, gjakosjesh dhe arrestimesh, ku “të fortët” duket se bëjnë ligjin./BoldNews
