Analisti Artan Hoxha ka deklaruar se veprimet dhe vendimet e fundit të Edi Ramës, tregojnë se po merr formë ‘diktatura Rama’.
Hoxha u shpreh se në ditët, muajt në vijim do të shohim shumë dhunë ndaj qytetarëve nga pushteti dhe më pak demokraci.
Sipas tij, gjithçka do të bëhet në emër të të mirës publike, por në fund përfituesit do të jenë klientët e qeverisë.
“Tashmë po merr formë ajo që mund ta quajmë ‘diktatura Rama’.
Disa e quajnë narkodiktaturë, disa e quajnë autokraci, por ka një emër, është ‘të gjitha pushtetet në dorën e Edi Ramës’.
Me të gjitha këto pushtete ne do të kemi rastin të shohim pushtetin e Edi Ramës të bëjë plot gjëra të këqija, të bëjë dhe disa gjëra të mira. Por në rezultante ne do të shohim më shumë dhunë, më pak mirëqënie, më pak demokraci, më shumë diskriminim dhe për rrjedhojë, trajektorja e zhvillimit të Shqipërisë, nuk do të jetë demokratik dhe ekonomik, por do të jetë një formë shteti që do ti shërbejë të paktëve, klientelës, që janë gjithnjë e më afër pushtetit të tij, edhe këto shpesh të sakrifikueshëm.
Është nevoja e pushtetit që herë pas here të lustrohet duke bërë kurban të vetët.
Pastaj ne mund ti marrim këto aksione një për një.
Të gjitha këto aksione nga diktatori Rama do të paralajmërohen në të mirë të njerëzve të zakonshëm, kontrolli i territorit në të mirë të publikut që të përfitojë hapësira e lira publike.
Kontrolli me faturë i qumështit është në emër të sigurisë ushqimore.
Gjithmonë do të gjendet një arsye, siç iu gjet inceneratorëve ai slogani i madh ‘ta pastrojmë Shqipërinë’.
Ne do shohim se si këto aksione do të marketohen nga pushteti i tij, në tërësinë e tyre do të bëjnë vetëm dëm.
Është e provuar nga historia njerëzore, diktatorët e ndritur janë përjashtim nga rregulli dhe kanë bërë dëme. Ato kombe kanë përfunduar keq dhe pastaj është dashur ta përmbysin diktatorin”, u shpreh Artan Hoxha në SYRI TV.
