Një operacion ndërkombëtar i koduar “Global Chain” ka goditur rrjetet kriminale që trafikojnë qeniet njerëzore, duke rezultuar në 158 arrestime dhe identifikimin e 1,194 viktimave, përfshirë shumë të mitur. Operacioni gjashtëditor u zhvillua në 43 vende në Evropë, Azi, Afrikë dhe Amerikën e Jugut, me pjesëmarrjen e rreth 15,000 oficerëve të policisë.
Sipas Europol, shumica e viktimave janë gra që rekrutohen jashtë vendit dhe shfrytëzohen në sallone masazhi të paligjshme për prostitucion, ndërsa disa fëmijë janë shfrytëzuar për lypje të detyruar dhe aktivitet kriminal. Në Maltë, policia liroi tri gra kolumbiane që ishin detyruar të punonin si prostituta, ndërsa në Itali u zbuluan 75 viktima të mundshme në sallone masazhi.
Viktimat vijnë nga 64 vende të ndryshme, ndërsa policia rumune arrestoi 9 persona të dyshuar për trafikimin e fëmijëve të moshës 7 deri në 15 vjeç. Gjatë operacionit u sekuestruan 277,669 euro në para të gatshme, 30 armë, 65 dokumente të falsifikuara dhe një ton kanabis.
Operacioni u drejtua nga autoritetet e Austrisë dhe Rumunisë dhe përqendrohej kryesisht në territorin evropian, duke shkatërruar një rrjet të gjerë të krimit të organizuar.
