Kolegji i Posaçëm i Apelimit, KPA, zhvilloi të mërkurën seancën për shqyrtimin e ankimit të Komisionerit Publik kundër vendimit që konfirmoi në detyrë prokuroren Elona Alvora.
Çështja lidhet me ankimin e Komisionerit Publik ndaj vendimit të Komisionit të Pavarur të Kualifikimit të 7 qershorit 2022, i cili e kishte konfirmuar Alvorën në detyrë. Në paraqitjen e konkluzioneve përfundimtare, përfaqësuesi i SPAK, Adnan Xholi, pranoi se ndaj subjektit të rivlerësimit ishin evidentuar mangësi në vlerësimin e aftësive profesionale.
Megjithatë, ai theksoi se këto mangësi nuk kanë cenuar hetimet dhe mund të korrigjohen përmes një programi trajnimi në Shkollën e Magjistraturës. Për këtë arsye, ai kërkoi ndryshimin e vendimit të KPK-së, pezullimin nga detyra të Alvorës dhe detyrimin e saj për të ndjekur trajnimin.
Nga ana e saj, prokurorja Elona Alvora paraqiti shpjegime të përmbledhura për çështjet penale të përmendura në ankim, duke theksuar se kishte ndërmarrë veprime hetimore të logjikshme dhe në përputhje me ligjin procedural.
Ajo kundërshtoi ankimin për dy çështjet tashmë të transferuara pranë Inspektorit të Lartë të Drejtësisë dhe kërkoi lënien në fuqi të vendimit të KPK-së që e kishte konfirmuar në detyrë.
Pas dëgjimit të palëve, KPA shpalli mbylljen e shqyrtimit gjyqësor dhe tërheqjen për marrjen e vendimit, i cili do të shpallet më 16 korrik.
