Gjykata e Posaçme ka liruar nga masa e sigurisë “Arrest në shtëpi”, Jamarbër Malltezin, dhëndrin e Sali Berishës, i cili është marrë i pandehur për dosjen e privatizimit të ish-kompleksit sportiv “Partizani”.
Vendimi është marrë nga gjyqtarja Elsa Ulliri, ku arresti i shtëpisë i është zëvendësuar Malltezit me garanci pasurore prej 3 milionë lekësh të reja.
Jamarbër Malltezi akuzohet për kryerjen e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim, si dhe për “Pastrim të produkteve të veprës penale ose veprimtarisë kriminale”.
Ai u arrestua nga Policia me urdhët të SPAK që mbrëmjen e 21 Tetorit të vitit 2023, në aeroportin e Rinasit, teksa ishte duke pritur bashkëshorten. Ndërkohë, më 21 Nëntor të vitit 2023, Gjykata e Posaçme e Apelit i ndryshoi masën e sigurisë nga “arrest me burg” në “arrest shtëpie”.
Në një prononcim për mediat, pas vendimit të sotëm, Jamarbër Malltezi u shpreh se i kanë provuar për 20 muaj lirinë, teksa e konsideroi çështjen gjyqësore ndaj tij si politike dhe se e kanë hetuar për 5 breza.
Jamarbër Malltezi: Ishte një farsë politike. Nuk ka një shtet ligjor por një shtet që lufton armiqtë e PS njësoj si në ‘45. Vendimi sot vjen pas 20 muajsh privim lirie. Thjesht me një urdhër politik të Ramës. Në kongresin e PS, Rama urdhëroi SPAK të procedojë Sali Berishën. Të njëjtën gjë kërkoi një diplomate e korruptuar si Yuri Kim. Një proces politik që u ndot gjatë rrugës. Kemi 16 letra sapo Rama urdhëroi të veprojë, SPAK kërceu çfarë të duash. 16 kërkesa brenda muajit.
30 vjet hetime nga instituti i sigurimeve shoqërore. Kanë hetuar 5 breza, jo një brez. E kanë filluar me stërgjyshin tim para 90 vjetësh. Kam gjetur firmën e stërgjyshit tim. Do jem në gjithë seancat dhe do përballemi. Ka kaq shumë gjëra qesharake. Duke filluar që nga pronat. Si u bë shteti pronar. Shteti u bë pronar njëlloj si Edi Rama. I nxori njerëzit me gaz lotsjellës nga Astiri. Besoj se është 3 milionë lekë, besoj se do e marrë.
Ndërkohë, po sot, kryetari i Gjykatës së Posaçme, Erjon Bani ka marrë vendimin për të rrëzuar kërkesën e gjyqtares Elsa Ulliri, e cila kishte kërkuar dorëheqjen nga gjykimi i çështjes, pasi pretendonte konflikt interesi për shkak se është kushërirë me deputeten e PD-së, Andia Ulliri.
Por, siç duket ky argument nuk ka bindur GJKKO-në për ta larguar nga gjykimi i çështjes dhe për të caktuar një gjyqtar të ri.
Seanca e radhës për këtë dosje, do të mbahet më 21 korrik 2025. E para dështoi, pasi kryetari i Partisë Demokratike, Sali Berisha nuk ishte njoftuar zyrtarisht për të shkuar në gjyq.
Sali Berisha akuzohet për veprën penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Organi i akuzës akuzon Malltezin për përfitimin e të ardhurave në vlerën e 5.4 milionë eurove nga një biznes ndërtimi, falë vendimeve të qeverisë të marra nga vjehrri i tij.
Në të njëjtën çështje, i pandehur për korrupsion aktiv është marrë edhe biznesmeni i ndërtimit, Fatmir Bektashi, ndërsa Xhimi Begeja dhe Andia Pustina akuzohen për pastrim parash. Si të pandehur në këtë çështje për akuzën e pastrimit të parave janë edhe shoqëritë Studio Pustina sh.p.k., Homeplan sh.p.k. dhe Kontakt sh.p.k.
Deri më tani, si Berisha, po ashtu edhe Malltezi, e kanë konsideruar si një gjyq politik me urdhër të Edi Ramës.
