Deputeti i Partisë Demokratike, Flamur Noka u përfshi në një debat me kryeparlamentaren Elisa Spiropali.
Gjatë fjalës nga foltorja e Kuvendit, Noka tha se mazhoranca ka bërë çmos për të cënuar fjalën e lirë duke e asgjësuar opozitën.
Por në moment fjala “mamicë” i dogji Spiropalit, e cila i tërhoqi vërejtje deputetit demokrat duke e paralajmëruar për penalitet.
DEBATI, Noka-Spiropali:
Noka: Nuk imagjinohej që Parlamenti të shndërrohej nga një vend i fjalës i lirë në një vend që bëhet çmos për ta asgjësuar atë. E ka bërë linda e zezë e bëri salmonela…
Spiropali: Ju tërheq vëmendjen.
Noka: E bëri dhe ajo që shihte ëndrra se ishte mamicë.
Spiropali: Jeni bërë për turp. Do t’ju heq të drejtën e fjalës.
Noka: E neverishtme si i shndërroi sulltani këto qenie. Në këtë mandat ky parlament ka noterizuar çdo gjëmë të bërë nga qeveria që është organizatë kriminale dhe vetë sulltani. Kemi parë së si vota e lirë asgjësohej. Kjo qeveri ka vendosur në çdo hallkë të shtetit, drogën, krimin dhe korrupsionin. Parlamenti, deputeti, kartelet, krimi kishin të gjithë mision të shkatërronin votën e lirë.
