Komisionerja për Zgjerimin e Bashkimit Europian, Marta Kos ka filluar që t’i serviloset kryeministrit Edi Rama i cili në mënyrë të paprecedentë do të qeverisë Shqipërinë për 16 vite radhazi.
Anëtarësimi “imagjinar” i Shqipërisë në Bashkimin Europian brenda vitit 2030 ishte fokusi kryesor i propagandës së kryeministrit Edi Rama në fushatën e 11 majit. Nga mëngjesi deri në darkë në çdo dalje televizive Rama u premtonte shqiptarëve pasaportën europiane sikur të ishte një “lider global” dhe gjithçka të varet nga duart e tij.
Por kreu i qeverisë gjatë fushatës elektorale herë pas here merrte “mbështetje” nga Marta Kos e cila vijonte të njëjtën linjë elektorale si Edi Rama, duke mbajtur me shpresë shqiptarët se medemek anëtarësimi në BE është shumë pranë të një vendi që po shkon drejt shpopullimit alarmant.
Vlen të theksojmë që Marta kohët e fundit mesa duket është kthyer një “vegël” e Edi Ramës pasi po bën në mënyrë të përkryer “PIAR”-in e një qeverisje që prej 12 vitesh i ka dalë boja me skandalet dhe tenderat korruptivë.
Pavarësisht se kryebashkiakë, ministra, ish-ministra socialistë të emëruar nga Edi Rama ndodhen në qeli ose janë pjesë hetimore e SPAK-ut, kjo nuk përbën asnjë rëndësi për Marta Kos e cila nga Samiti në Shkup premton se Shqipëria mund të hapë të gjithë kapitujt deri në fund të këtij viti.
Në krah të Edi Ramës, Komisionerja për Zgjerimin Kos tha se mes vendeve anëtare të BE-së ka konsensus për zgjerim në të ardhmen dhe ky çast duhet të shfrytëzohet.
“Ka konsensus për zgjerim shtesë në të ardhmen. Nuk ishte kështu në të kaluarën, por keni rastin që patjetër duhet të shfrytëzohet. Kjo nuk do të zgjasë përgjithmonë dhe shoh zhvillim të dukshëm. Shqipëria, i nderuar zoti kryeministër Edi Rama, hapi tre kapitur në gjashtë muajt e fundit. Ju faleminderit që ndikuat në procesin e zgjerimit. Nëse vazhdoni kështu do të mund të hapim të gjithë kapitujt këtë vit. Siç thashë dje mezi pres ta festoj hapjen e kapitullit të fundit”, tha Kos.
Kos, në fjalën e saj tha se rajoni i Ballkanit Perëndimor është shumë i rëndësishëm dhe se BE-ja do që të ndihmojë “sa më shumë të mundemi që të arrijmë qëllimet”.
“Reformat që kërkojmë prej jush nuk janë të thjeshta. Kërkojnë transformim të thellë shoqëror dhe nevojiten liderët që ta çojnë përpara këtë”, u shpreh Kos./ Boldnews.al
