Jeff Bezos dhe Lauren Sánchez kurorëzuan dashurinë e tyre me një ceremoni madhështore treditore në Venecia, që u konsiderua nga mediat si “dasma e shekullit”. Ngjarja tërhoqi vëmendjen e opinionit botëror jo vetëm për shkëlqimin dhe të ftuarit e famshëm, por edhe për impaktin ekonomik në qytetin italian.
Ceremonia u zhvillua në disa nga lokacionet më ikonike të Venecias, nën masa të forta sigurie. Zona të tëra u izoluan për të mbrojtur privatësinë e çiftit dhe të ftuarve si Oprah Winfrey, Kim Kardashian e Leonardo DiCaprio.
Sipas burimeve mediatike, kostoja e dasmës arriti rreth 48 milionë euro, shumë që për Bezos-in përbën më pak se 0.01% të pasurisë së tij personale, që llogaritet në afro 230 miliardë dollarë. Në terma krahasues, kjo është si një qytetar europian që shpenzon rreth 23 euro për një darkë në piceri.
Lauren Sánchez u shfaq me 27 fustane të ndryshëm gjatë eventeve, ndërsa Venecia u shndërrua në një skenografi filmike për dasmën, me gondola të personalizuara, dekor historik dhe ndalim të fluturimeve mbi qytet.
Sipas një studimi të publikuar nga kompania JFC, ndikimi ekonomik që kjo ngjarje ka pasur për Venecian vlerësohet në rreth 957 milionë euro, ose afërsisht 70% të xhiros turistike vjetore të qytetit. Ministrja italiane e Turizmit, Daniela Santanchè, tha se kjo dasmë përfaqëson një mundësi të jashtëzakonshme për rilindjen e sektorit turistik pas rënies në fillim të vitit.
