Çmimet në Shqipëri sipas Eurostat-it e kanë kapërcyer mesataren e vendeve të Bashkimit Europian, ku produktet e konsumit janë 20-30 për qind më shtrenjtë.
Eksperti i Ekonomisë Pano Soko duke folur në MCN theksoi se kanë ndikuar mungesa e prodhimit vendas dhe fakti që nuk kemi stimuluar bujqësinë.
“E para është mungesa e prodhimit vendas. Prodhimi vendas zakonisht ka çmim më të ulët sepse s’ka kosto transporti. Më shumë se 60 për qind e produkteve, ushqimore, bujqësore, nënproduktet, ne i importojmë. Kemi humbur treg kohë pas kohe sepse s’kemi stimuluar bujqësinë dhe prodhimin. Bujqësia ka qenë mbretëresha e ekonomisë sonë. Sot është sektori i katërt. Subvencionet që ne japim në bujqësi janë 4 herë më të pakta se ato të Kosovës, ndërkohë që ata kanë dy herë më pak tokë dhe dy herë më pak bujq se ne.
Prodhimi vendas ka humbur treg dhe bujqit kanë braktisur tokën për shkak të humbjes me prodhimin e huaj, maqedonas, serb. Kur bie prodhimi vendas fuqizohet importuesi. Në një ekonomi të deformuar importuesit janë më të fuqishëm se sa prodhuesit. Patjetër mund të ulen çmimet, por duhet të prodhosh ti. Domaten ti e merr nga Maqedonia e Veriut, ka kosto. Ti do jesh patjetër më shtrenjtë se Maqedonia e Veriut, se ajo e ka produktin e vet. Duhet të stimulosh produktin tënd. Sasia e konsumit do të mbetet njëjta, ajo që ndahet është nga do vijë produkti, nëse qumështi do vijë nga dhitë dhe delet tona, apo nga ato të Serbisë.
Lufta e qeverisë është që këtë llokmë të tregut ta marrim ne. Ne jemi i vetmi vend që kur plasi kriza Rusi-Ukrainë, në vend të stimulonim prodhimin vendas pasi vendet kuptuan që globalizmi ishte në rrezik, filluan bënë politika për të stimuluar blegtorin, bujkun, peshkatarin, Shqipëria atë vit bëri të kundërtën komplet. Në 2021 Shqipëria rriti taksat e imputeve bujqësore, kur të gjitha vendet po i bënin zero taksat” – tha Soko.
