Anëtarja e Delegacionit të Komisionit Europarlamentar për Asocimin BE-Shqipëri Cristina Guarda ngriti shqetësimin për shkeljet e të drejtave të njeriut dhe mungesën e transparencës në marrëveshjen për emigrantët mes Italisë dhe Shqipërisë.
Guarda tha se kjo marrëveshje ngre probleme serioze ligjore dhe krijon paqartësi juridike për qytetarët e vendeve të treta që ndodhen në Itali dhe mund të transferohen në Shqipëri, duke rrezikuar zhvendosjen e padrejtë të përgjegjësive në fushën e emigracionit.
Guarda shprehu nevojën për dialog dhe zgjidhje alternative, duke theksuar se Shqipëria nuk duhet të përfshihet në procese që mund të çojnë në pasoja ligjore për veprimet e Italisë.
“Dëshiroj të flas për disa çështje, si mjedisi dhe vlerësimet e ndikimit mjedisor. Aktualisht kam përgjegjësi për disa çështje të rëndësishme dhe dëshiroj t’u drejtoj disa pyetje përfaqësuesve të Parlamentit Shqiptar, por edhe këtij Parlamenti.
Mirëpres përpjekjet dhe reformat që janë ndërmarrë me qëllim luftimin e korrupsionit dhe avancimin drejt integrimit europian.
Megjithatë, jam e shqetësuar për shkeljet e të drejtave të njeriut, diskriminimin, dhe në mënyrë të veçantë për shkeljet që lidhen me të drejtat e azilit. Mendoj sidomos për marrëveshjen mes Italisë dhe Shqipërisë, e cila ngre shqetësime serioze për shkak të problemeve ligjore që ajo përmban përfshirë mungesën e transparencës dhe paqartësinë juridike për qytetarët e vendeve të treta që ndodhen në Itali dhe mund të transferohen në një qendër në Shqipëri.
Kjo marrëveshje lë shumë për të dëshiruar dhe sjell rrezikun e transferimit të përgjegjësive në fushën e emigracionit. Nuk dua që Shqipëria të përfshihet në një proces që potencialisht mund të përfundojë me dënime për veprime që i ka ndërmarrë Italia. Marrëveshja, siç është paraqitur aktualisht, nuk është e qartë dhe, për pasojë, mund të çojë në keqkuptime.
Si mund të gjejmë zgjidhje alternative së bashku? Nuk dëshiroj që të kemi marrëveshje të këtij lloji, të cilat i zhvendosin përgjegjësitë në mënyrë të padrejtë dhe pa një kuadër të qartë ligjor.”, tha Cristina Guarda .
