Jean-Claude Juncker, ish-presidenti i Komisionit Europian kritikon pasardhësen e tij që nuk ka ndërvepruar drejtpërdrejt me liderin amerikan
Ish-kreu i Komisionit Europian, Jean-Claude Juncker, ka kritikuar pasardhësen e tij, Ursula von der Leyen, për mungesën e angazhimit të drejtpërdrejtë në përpjekje për të shmangur në kohë luftën tregtare me Donald Trump.
“Mendoj se do të kishte qenë më e udhës, që Komisioni të përpiqej të siguronte një takim sa më herët që të ishte e mundur, sepse ishte e parashikueshme që ai do të rikthehej te çështja e tregtisë,” tha Juncker.
“Nuk do të ketë marrëveshje pa praninë aktive të presidentes së Komisionit,” shtoi ai, duke folur nga zyra e tij në Bruksel, pesë kate poshtë asaj të Von der Leyen.
Presidenti amerikan këtë vit ka rikthyer tarifat për çelikun dhe aluminin nga BE-ja, të cilat i kishte vendosur gjatë mandatit të tij të parë, por që Juncker arriti t’i pezullojë në vitin 2018 duke premtuar se blloku do të blinte më shumë gaz dhe sojë nga SHBA. Trump ka kërcënuar gjithashtu me vendosjen e një takse 50 % për të gjitha importet nga BE-ja, nëse negociatat aktuale tregtare me Brukselin dështojnë deri më 9 korrik.
Juncker tha se ai e kishte takuar Trumpin të paktën shtatë herë para se të arrinte marrëveshjen në 2018.
Ndërkohë, Von der Leyen nuk ka pasur asnjë takim dypalësh për të diskutuar mosmarrëveshjet tregtare, por ka folur me Trumpin vetëm shkurtimisht në evente te ndryshme ndërkombëtare, si funerali i Papa Françeskut në prill apo në Forumin Ekonomik Botëror në Davos në janar. Ajo po merr pjesë në samitin e G7 në Kanada, që ka nisur të hënën, ku është i pranishëm edhe Trump, por zyrtarët në Bruksel nuk janë të sigurt nëse do të diskutohet çështja tregtare.
Juncker pranoi se për Von der Leyen është “më e vështirë”, pasi armiqësia e Trump ndaj Europës është më e hapur dhe ai po udhëton më pak jashtë vendit krahasuar me mandatin e tij të parë. Por, sipas tij, delegimi i bisedimeve te komisioneri për tregtinë, Maroš Šefčovič, ishte një gabim.
“Trump më duket pa s shumë njësoj,” tha ish-kryeministri i Luksemburgut. Por presidenti amerikan tani i thotë publikisht ato që më parë i pohonte pas dyerve të mbyllura, si për shembull akuzat se BE-ja ishte krijuar për të “mashtruar” SHBA-në.
Juncker tha se zyrtarët e Komisionit kanë gabuar në strategjinë e tyre, duke premtuar vendosjen e tarifave ndëshkuese për mallra amerikane me vlerë 26 miliardë euro, përfshirë alkoolin – një masë kundër të cilës shumë shtete anëtare u rebeluan për shkak të frikës se SHBA do ta përmbushte kërcënimin për taksa 200 % ndaj verërave dhe pijeve të tjera europiane. Në fund, Komisioni hoqi nga lista uiskin amerikan dhe produkte të tjera, duke e reduktuar listën në 21 miliardë euro eksporte amerikane – e cila gjithashtu është pezulluar përkohësisht në pritje të negociatave.
“Nuk e di nëse është shenjë dobësie, por është padyshim shenjë përgatitjeje të dobët, sepse këto sanksione të caktuara mund të ishin zëvendësuar me masa të tjera me të njëjtin qëllim,” tha Juncker.
Në të kundërt, ai kujton se kishte hartuar një listë me shtetet amerikane që drejtoheshin nga guvernatorë republikanë dhe kishte synuar që ta vinte Trumpin në vështirësi, duke goditur aty ku kolegët e tij nuk do të ishin të kënaqur, dhe kjo strategji funksionoi.
Zyrtarët europianë thonë se po punojnë për një listë me produkte amerikane me vlerë 95 miliardë euro në rast se negociatat dështojnë, por pranojnë se edhe kjo listë ka gjasa të zbutet nga presioni i shteteve anëtare.
Brukseli ka tentuar të ripërsërisë ofertën e suksesshme të Junckerit për të reduktuar deficitin tregtar duke blerë më shumë mallra amerikane, por këtë herë nuk ka bërë shumë përshtypje në administratën Trump.
Importet e sojës “u rritën me 418 % gjatë gjashtë muajve pas marrëveshjes”, tha Juncker.
I pyetur si duhet trajtuar Trump, Juncker tha se duhet ta “respektosh” dhe t’i flasësh “në mënyrë të sjellshme, pa imituar mënyrën e tij të të folurit”.
Juncker kujtoi se Trump e kishte quajtur “vrasës brutal” dhe “djalë të fortë”. “Duhet ta respektosh, sepse ke nevojë për respektin e tij.”
Presidenti amerikan e ka quajtur von der Leyen “fantastike” pas një takimi të shkurtër në Romë gjatë funeralit të Papës. Por bisedimet që atëherë kanë ngecur dhe Trump ka kërcënuar me tarifa 50 % në vend të 20 %, duke akuzuar Brukselin për “zvarritje” në negociata. / FT
