Një protestë për mungesën e ujit për vaditje u zhvillua sot nga një grup banorësh të fshatit Veliternë në njësinë administrative Pirg të Maliqit.
Ata thonë se sasia prej 30 litrash në sekondë që vjen përmes kanaleve vaditëse është e pamjaftueshme për të përballuar nevojat në këtë periudhë të nxehtë, duke vënë në rrezik të mbjellat bujqësore.
E njëjta situatë sipas tyre përsëritet prej vitesh ndërsa akuzojnë institucionet përgjegjëse se po e menaxhojnë keq shpërndarjen e ujit.
Fshati Veliternë është një nga zonat më prodhuese në bujqësi, veçanërisht për kultivimin e qepës dhe patates – kultura që kërkojnë ujitje të rregullt për të ruajtur rendimentin.
Banorët paralajmërojnë se, nëse nuk merren masa të menjëhershme, dëmet në bujqësi do të jenë të konsiderueshme.
