Të paktën katër persona u vranë në Kolumbi këtë të martë, 10 qershor, pasi grupet rebele shpërthyen bomba pranë stacioneve të policisë në qytetin Cali dhe në provincën fqinje Cauca.
Zëdhënës të ushtrisë dhe policisë fajësuan për sulmet grupin FARC-EMC, një organizatë e udhëhequr nga ish-anëtarë të Forcave të Armatosura Revolucionare të Kolumbisë, të cilët u shkëputën nga grupi pasi ai nënshkroi një marrëveshje paqeje me qeverinë në vitin 2016.
Autoritetet thanë se rebelët vendosën bomba në makina dhe motoçikleta që ishin parkuar pranë stacioneve të policisë.
Sulmet ndaj stacioneve të policisë ndodhën vetëm disa ditë pasi Miguel Uribe, një kandidat konservator për president, u qëllua gjatë një tubimi në Bogota. Autoritetet po hetojnë se kush qëndron pas sulmit ndaj Uribes, i cili ndodhet në gjendje kritike shëndetësore.
Qeveria e Kolumbisë ka pasur vështirësi në kontrollimin e dhunës në zonat urbane dhe rurale, ndërsa disa grupe rebele përpiqen të marrin kontrollin e territoreve të braktisura nga Forcat e Armatosura Revolucionare të Kolumbisë pas marrëveshjes së paqes me qeverinë.
Bisedimet për paqe midis fraksionit FARC-EMC dhe qeverisë u ndërprenë vitin e kaluar pas një serie sulmesh ndaj komuniteteve indigjene.
Qeveria aktualisht po zhvillon bisedime me një tjetër fraksion të grupit, të udhëhequr nga komandanti Luis Alberto Alban, i njohur gjithashtu si Marcos Calarca.
