Administrata Trump urdhëroi vendosjen e marinsave në Los Angeles dhe intensifikoi bastisjet ndaj emigrantëve pa dokumente, duke nxitur më shumë zemërim te qytetarët që protestuan për të katërtën ditë me radhë.
Rreth 700 marinsa me bazë në Kaliforninë Jugore janë dërguar në Los Angeles, si pjesë e një strategjie federale për të shuar demonstratat në rrugë që kundërshtojnë bastisjet kundër emigracionit të paligjshëm.
Edhe pse misioni i tyre për të mbrojtur personelin është i përkohshëm, duke plotësuar boshllëqet derisa një kontingjent i plotë prej 4,000 trupash të Gardës Kombëtare të mund të arrijë në Los Angeles – vendosja e marinsave është një përdorim i jashtëzakonshëm i forcës ushtarake në mbështetje të një operacioni policor, dhe kjo vjen pavarësisht kundërshtimit të udhëheqësve shtetërorë dhe lokalë.
Guvernatori i Kalifornisë, Gavin Newsom, ka bërë të ditur se do të ndërmarrë veprime ligjore kundër vendosjes së trupave, duke e quajtur Trumpin “të çmendur” dhe “diktatorial”. Protesta u zhvilluan gjithashtu në të paktën nëntë qytete të tjera të SHBA-së të hënën, duke përfshirë Nju Jorkun, Filadelfian dhe San Franciskon, sipas mediave lokale.
Plumba gome, granata zhurmuese dhe armë të tjera jo-vdekjeprurëse janë përdorur kundër protestuesve. Policia e Los Anxhelosit ka arrestuar dhjetëra demonstrues të tjerë me një sërë akuzash, duke përfshirë plaçkitje, hedhje molotovi dhe sulme ndaj oficerëve.
Sekretarja e Sigurisë Kombëtare të SHBA-së, Kristi Noem, u zotua se do të kryhen edhe më shumë operacione për të arrestuar shkelësit. Zyrtarët e Trump i kanë cilësuar protestat si të paligjshme dhe kanë fajësuar demokratët për lejimin e trazirave dhe mbrojtjen e emigrantëve pa dokumente.
