Tre kandidatë të Partisë Demokratike kanë depozituar ankesa në Komisionion e Ankimimeve dhe Sanksioneve (KAS), pasi pretendojnë për parregullsi gjatë numërimit të votave në Qarkun e Tiranës dhe tjetërsim të tyre. Bëhet fjalë për Ilir Alimehmetin, Mimoza Hajdarmatajn dhe Lisandër Hoxhën.
Alimehmeti, në shkresën e depozituar në KAS, pretendon se ka pasur parregullsi në masën rreth 5% të votave të numëruara të konstatuara nga ana e tij. Në një qendër votimi, ai thotë se 27 vota preferenciale për të, i kanë kaluar një tjetër kandidati, duke u shënuar në tabelën përmbledhëse 0 vota.
Ai rendit edhe qëndrat e votimit ku pretendon se rezultati është i ndryshëm nga ato të miratuara, gjë që sipas tij, krijojnë bindjen se numërimi ka pasur problematika në të gjithë qarkun, ndaj edhe kërkon rinumërim ose rivlerësim të të gjithë QV-ve.
“Duke u bazuar në këqyrjet e deritanishme rezulton se me një parregullsi në masën rreth 5% të votave të numëruara të konstatuara nga ana ime, duke patur parasysh faktit që subjekti unë PD-ASHM ka 164 316 vota, rezultati për kandidatët mund të ndryshojë, në kushtet që diferenca midis meje dhe kandidatit të renditur përpara në listë është tejet e ngushtë ose rreth 1.2% e numrit total të të gjithë votave të subjektit”, thuhet në shkresën e Alimehmetit.
Ndërkohë, Mimoza Hajdarmataj pretendon se i janë tjetërsuar mbi 1 mijë vota të tjetërsuara, në të paktën 6 KZAZ. Teksa liston QV-të, ku sipas saj rezultati është i ndryshëm nga ato të miratuara, shkruan se: “Qendrat e votimit të mësipërme, por edhe shumë të tjera, krijojnë bindjen se numërimi ka patur problematika në të gjithë qarkun e Tiranës, duke krijuar shkak për rinumërimin dhe/ose rivlerësimin të të gjitha qendrave të votimit.”
Po ashtu, edhe Lisandër Hoxha, i cili kërkon rinumërimin e votave, pretendon se nga videot e marra jo të plota nga KQZ, ka konstatuar se disa vota preferenciale të tijat janë regjistruar në emër të një kandidati tjetër.
“Sipas informacioneve, ky fenomen ka ndodhur edhe në KZAZ të tjera, duke tjetërsuar rezultatin e zgjedhjeve. Kërkoj rivlerësimin e votave të kandidatëve për të gjitha KZAZ e qarkut Tiranë” – thuhet në shkresën e tij.
Kujtojmë se Partia Demokratike arriti të marrë vetëm një mandat nga listat e hapura në Tiranë, të cilën arriti ta fitonte Jorida Tabaku me 20 586 vota preferenciale.
Sa i përket kandidatëve që kërkojnë riunumërim, Ilir Alimehmeti ka marrë 18 128 vota preferenciale, Mimoza Hajdarmataj 5 233 vota dhe Lisandër Hoxha 2 089 vota preferenciale.
SHKRESA E ILIR ALIMEHMETIT
SHKRESA E MIMOZA HAJDARMATAJT
SHKRESA E LISANDËR HOXHËS
