Kolegji i Posaçëm i Apelimit (KPA) vendosi të martën, më 27 maj, ndryshimin e vendimit të Komisionit të Pavarur të Kualifikimit për shkarkimin e gjyqtarit të Tiranës, Altin Abdiu, dhe e riktheu atë në detyrë. Vendimi u mor me shumicë votash nga trupi gjykues i Kolegjit, i kryesuar nga Ina Rama, me relator Sokol Çomon dhe anëtare Albana Shtylla, Natasha Mulaj dhe Rezarta Schuetz, pas gjykimit në dhomë këshillimi të ankimit të Abdiut. Vendimi i KPA është përfundimtar dhe ka efekt të menjëhershëm.
Komisioni e shkarkoi gjyqtarin Altin Abdiu më 28 qershor të vitit 2022, për probleme në kriterin e pasurisë, por konkluzioni i shkallës së parë të vetingut u gjet i pabazuar nga shumica e trupës së Kolegjit. Ndërkohë, ai mori vlerësim pozitiv për figurën dhe u çmua se kishte arritur nivel kualifikues në aspektin profesional.
Gjyqtari Altin Abdiu ka një karrierë të gjatë në sistemin e drejtësisë. Prej vitit 1995 ai ushtron funksionin si gjyqtar në Gjykatën e Tiranës.
