Sali Berisha, në një deklaratë nga selia blu, tha se tani do të fillojë luftën për mbrojtjen e votës së lirës, duke paralajmëruar se disponon dokumente që tregojnë farsën elektorale të zgjedhjeve të 11 Majit, duke iu kërkuar shqiptarëve që të kenë durim.
Lideri demokrat u shpreh se nuk do të pranojnë zgjedhje të tilla dhe një rezultat të tillë, si dhe as që të pranojnë që Edi Rama t’u imponojë shqiptarëve atë rezultat.
Berisha publikoi rezultat e disa prej kutive në Fier dhe në Vlorë, ku PD dilte gjithmonë me 21 apo me 26 vota për kuti, pasi sipas tij, zbatohej urdhri që u ishte dhënë.
Sali Berisha: Këtu do paraqesim sot provat e para, dëshmitë të para të këtij krimi. Por garantoj qytetarët se ne disponojmë me qindra dhe mijëra prova për të gjitha aspektet kriminale, manipulimet e votës së qytetarëve shqiptarë, të cilat ne do i bëjmë publike çdo ditë. Asnjë njeri të mos mendojë se akuzat tona nuk kanë mbështetje në dokumente dhe prova materiale të pakundërshtueshme. Sot ne fillojmë për t’u paraqitur ju disa rezultate që flasin vetë.
Në Fier, siç e shihni, PD dhe koalicioni në këtë kuti merr 21 vota kundrejt 341 votave të PS. Pra, 15 herë diferenca. Por nuk është kjo arsyeja. Përsëri këtu, PD merr fiks 21 vota kundrejt 206 votave të PS. E treta, përsëri zbatohet urdhri, 21 vota kundrejt 284 votave. Përsëri, PD dhe koalicioni merr 21 vota kundrejt 302 votave. Vazhdojmë po në Fier. PD merr përsëri 21 vota, 346 vota Lubia dhe Edi Rama.
Këto janë… Vlora, këtu kanë qenë më dorëlëshuar. 26 vota PD kundrejt 210 vota PS. 26 vota PD dhe aleanca, 246 vota Lubi Balluku dhe Bledar Droga. Tjetra. 26 vota PD, 249 vota për PS-në. Tjetra. 26 vota PD, 2019 vota për PS-në. 20 vota për PD, 40 vota për PS-në. 20 vota për PD, 253 vota për PS-në. Vazhdojmë…. 20 vota për PD-në, 175 vota për PS-në. 20 vota për PD-në, 214 vota për PS-në.
Këto janë vetëm një pjesë. Çdo ditë ne do u paraqesim shqiptarë me betimin solemn se kurrë këto zgjedhje nuk do pranohen. Me besimin e plotë se sot ka shqiptarë të dëshpëruar. Sot ka shqiptarë të zemëruar. Sot ka shqiptarë të zhgënjyer. Por sot përsëri ka dhjetëra mijëra shqiptarë të gatshëm të luftojnë për votën e lirë. Dhe kjo luftë do fillojë. Të mos kujtojë kush kurrë se një kriminel si Edi Rama, një kryehajdut i këtij kombi si Edi Rama, një kryebandit i këtij kombi si Edi Rama, do mund t’u imponojë këto rezultate njerëzve të lirë të Shqipërisë, atyre që i besojnë lirisë. Dhe këto janë fillimi. Edhe njëherë u them shqiptarëve, durim se ne kemi dokumentet. Ne kemi bërë gjithçka për të mbikëqyrur votën tuaj. Ne natyrisht me kallashnikov votë nuk mbrojmë. Por, tani lufta fillon. Ne nuk pranojmë kurrë zgjedhje të tilla. Ne nuk pranojmë kurrë një rezultat të tillë.
