Gazetari Osman Stafa përmes një reagimi në rrjetet sociale, ka denoncuar sërish skandalet në Onkologjik, që sipas tij, krimet që ndodhin në këtëSpital, janë më të rënda se çdo akt tjetër që ndodh në këtë vend.
Duke sjellë rastin e një pacienteje 60-vjeçare, e cila sipas mjekes u vlerësua si rast urgjent me kancer dhe që kishte nevojë për trajtim, sistemi ishte ai që vendosi se kur duhet të nisë trajtimi për pacienten.
Sipas Osmanit, drejtuesit që merren me sistemin duhet të mbajnë përgjegjësi kur koha nuk pret për këta pacientë.
Për gazetarin, ajo çfarë po ndodh në Spitalin Onkologjik, nuk është papërgjegjshmëri, më shumë se sa vrasje me vonesë nga ata që drejtojnë këtë institucion mjekësor.
Postimi i plotë:
Krimi që ndodh në Spitalin Onkologjik është më i rëndë se çdo akt tjetër që ndodh në këtë vend. Nuk është më vetëm papërgjegjshmëri, është vrasje me vonesë.
Një grua rreth 60 vjeç, A.K, një nënë, një bijë, një grua që ka njerëz që e duan, u vlerësua si rast urgjent me kancer nga vetë mjekja onkologe që e pa në atë spital. Mjekja onkologe A.K, me ndërgjegje dhe ndjeshmëri profesionale, bëri gjithçka për të përshpejtuar trajtimin.
Data për konsultën me kirurgun? 11 qershor. Kështu e nxori sistemi.
E sistemi nuk pyet për urgjencë. Mirë sistemi i pashpirt, po frymorët e njerëzorët që e drejtojnë atë sistem, a nuk kanë ndjeshmëri njerëzore?
Deri në 11 qershor, koha do punojë kundër zonjës. Kanceri nuk pret radhe. Kanceri nuk njeh protokolle burokratike, o të mjerë.
Edhe me ndërhyrjen njerëzore të mjekes onkologe, edhe duke i vendosur përpara përgjegjësisë kontrolluesit e pashpirt të sistemit se: “do mbani ju përgjegjësi për jetën e zonjës”, sistemi nuk tutet, ai i qëndron fort idiotësisë së tij, i kontrolluar nga robotët idiotë. (Sipas familjarëve)
A keni shpirt? Është rast urgjent. Çdo minutë është humbje që kushton.
A keni ndjeshmëri njerëzore?
Çfarë po bëni ju që drejtoni këtë sistem?
Po i lini njerëzit të vdesin me radhë, si numra në një listë që s’ka fund. Po vrisni me heshtje, me pritje, me vonesë.
