Një ngjarje e rëndë është shënuar ditën e djeshme në fshatin Shtyllas të Fierit, ku një konflikt për motive të dobëta përfundoi me plagosjen e një shtetasi me mjet prerës. Babë e bir kanë dhunuar fizikisht dhe kanë goditur me sëpatë 58-vjeçarin Llesh Marku.
Policia njofton se i plagosuri është transportuar për ndihmë mjekësore në Spitalin Rajonal të Fierit.
Aktualisht është arrestuar njëri prej autorëve të dyshuar të ngjarjes, Pashuk Paluca, 63 vjeç, si dhe është shpallur në kërkim i biri, Ndue Paluca, 40 vjeç, si bashkëpunëtor në krim.
“Paraditen e djeshme, njoftohemi se në fshatin Shtyllas, është plagosur me mjet prerës një shtetas.
Menjëherë pas njoftimit të marrë, shërbimet e Komisariatit të Policisë Fier kanë shkuar në vendngjarje dhe falë reagimit në kohë kapën dhe shoqëruan një nga autorët e dyshuar.
Shtetasi P. P. dhe djali i tij, shtetasi N. P., dyshohet se gjatë një konflikti për motive të dobëta, kanë goditur me mjet prerës (sopatë), shtetasin Ll. M., 58 vjeç, i cili ndodhet në spital nën kujdesin e mjekëve.
Në përfundim të veprimeve procedurale, specialistët e Seksionit për Hetimin e Krimeve Kundër Personit bënë arrestimin në flagrancë të shtetasit P. P., 63 vjeç, për veprën penale “Vrasje me paramendim”, e kryer në bashkëpunim, e mbetur në tentativë.
Po punohet intensivisht për kapjen e djalit të tij, shtetasit N. P., 40 vjeç, banues në fshatin Shtyllas.
U sekuestrua në cilësinë e provës materiale mjeti prerës (sopatë), me të cilën autorët goditën 58-vjeçarin.”– njofton policia.
Materialet i kaluan për veprime të mëtejshme Prokurorisë pranë Gjykatë së Shkallës së Parë të Juridiksionit të Përgjithshëm Fier.
