Emisioni “Fol” u ndal sot në fshatin Zogaj të Tropojës, një vend me potenciale turistike, por ku banorët po largohen sepse nuk ka rrugë dhe nuk ka shërbime.
Përpos rrugës banorët ankohen edhe për mungesën e një qendre shëndetësore, duke u shprehur se mjekohen në Kosovë. Ata kërkojnë po ashtu shërbime bazike dhe jetike si energji elektrike pa ndërprerje dhe ujë për vaditje.
Ismeti, një banor i fshatit shprehet: “Këtu vetëm rruga mungon. Duam rrugë, ujë vaditje dhe energji elektrike. Një qendër shëndetësore, sepse njerëzit po ikin në Kosovë. Rruga është e pakalueshme dhe tepër skandaloze. I themi faleminderit Kosovës për ndihmën mjekësore. Pasuria shihet, hapësirat shihet, ky vend që prodhon të gjitha drithërat, është vend blegtoral, por edhe kjo pjesë e popullsisë që ka mbetur, ka mbetur me perspektivën se do bëhet rruga. Po të bëhet rruga ka zhvillim, ekonomi, punësim, dhe kthehen njerëzit që kanë ikur. Duhet mirëqenie më e mirë, kështu si në mesjetë jemi! 6 kilometra rrugë i bëjmë për një orë! Na kanë ardhur me radhë për zgjedhjet, por edhe të na thonë do bëhet parajsë, s’e besojmë më”.
Një tjetër banor tha: “Këtu kanë ardhur Mimi Kodheli, Pandeli Majko, kanë thënë që rrugën do e shtrojmë. Këtu janë 1000 makina që paguajnë taksë. Në kohën e regjimit të Enver Hoxhës, rruga ka qenë më e mirë!”
“Do kërkojmë referendum t’i bashkohemi Kosovës“, shprehen ata.
