Një grua e zhdukur për më shumë se gjashtë dekada në Wisconsin është gjetur – dhe rezulton se ajo thjesht nuk donte të gjendej, sipas autoriteteve.
Audrey Jean Backeberg, sot 82 vjeçe, u zhduk më 7 korrik 1962 nga Reedsburg, një qytet i vogël rreth 100 kilometra në veriperëndim të Madison, Wisconsin. Në atë kohë, ajo ishte 20 vjeçe. Një person që udhëtonte me të deklaroi se të dy kishin bërë autostop për në Madison dhe më pas kishin marrë një autobus Greyhound për në Indianapolis, Indiana. Sipas këtij personi, Backeberg u largua duke ecur pas qoshes nga stacioni i autobusëve dhe që nga ajo ditë nuk u pa më dhe nuk u dëgjua asnjë lajm për të.
Hetuesit nga Zyra e Sherifit të Qarkut Sauk thanë se për vite me radhë ndoqën shumë pista për ta gjetur, por pa sukses – dhe përfundimisht çështja u mbyll si e pazgjidhur.
Më herët këtë vit, çështja u rihap si pjesë e një shqyrtimi të rasteve të pazgjidhura, dhe një detektiv i ri, Isaac Hanson, u caktua për ta hetuar sërish.
Ai filloi të shqyrtonte materialet e vjetra, të riintervistonte dëshmitarë dhe të analizonte të dhënat e reja. Një pikë kyçe në hetim ishte një llogari në Ancestry.com që i përkiste motrës së Backeberg, e cila i dha mundësi Hanson të krahasonte të dhënat e vdekjes, regjistrimet e popullsisë dhe dokumente të tjera zyrtare.
Kjo e çoi në një adresë jashtë shtetit, ku ai kërkoi ndihmën e zyrës lokale të sherifit për të kryer një vizitë. Pas kësaj vizite, Hanson zhvilloi një telefonatë 45-minutëshe me Backeberg – një bisedë që tha se do ta mbante private.
“Ajo kishte arsyet e saj për t’u larguar,” tha Hanson për WISN. “Mendoj se thjesht e braktisi jetën e vjetër, hoqi dorë nga gjithçka dhe në njëfarë mënyre zgjodhi të jetonte jetën sipas mënyrës së saj.”
Zyra e Sherifit të Qarkut Sauk përfundoi se zhdukja e Backeberg ishte një vendim personal dhe jo rezultat i ndonjë aktiviteti kriminal.
“Ajo dukej e lumtur, e vendosur në zgjedhjen që kishte bërë, pa asnjë keqardhje,” përfundoi Hanson.
