Vllaznia është finalistja e parë e “Final 4” duke marrë një biletë për në sfidën e 12 majit.
Në stadiumin “Arena Kombëtare” në kryeqytet, Vllaznia mposhti 2-1 Dinamon në gjysmëfinalen e parë të “Final 4” dhe pret rezultatin e çiftit Egnatia – Partizani (5 maj) për të mësuar rivalët në finalen që do vendos titullin kampion në Superligë.
Në kryeqytet dueli ishte me një ritëm të kënaqshëm, me raste në të dyja portat. Ishte Dinamo që fitoi një penallti, por VAR thirri për kontroll arbitrin Eldorjan Hamiti dhe lezhjani ktheu vendimin e parë.
Më pas ishte radha e Vllaznisë që fitoi dy penallti, me Balaj që shënoi në minutat 29-të dhe 37-të për t’i dërguar në 19 golat sezonal.
Në pjesën e dytë Peter Itodo Mandela shkurtoi për Dinamon, por Blutë nuk mundën të reagonin më pas paçka rasteve. Pasi fituan Kupën e Shqipërisë tre ditë më parë (kundër Egnatias), Dinamo del nga gara për titullin kampion.
Kështu, ekipi i parë që shkon në finalen e sezonit të Superligës është Vllaznia e Thomas Brdaric.
