Eris Mehmetaj është i vetmi person i ndaluar deri më tani për atentatin e regjistruar mëngjesin e të dielës në lagjen “Hajro Çakërri” të Vlorë, ku u ekzekutua pranë banesës së tij 58-vjeçari Renato Hoxhaj.
Ai është ndaluar nga uniformat blu në Tiranë, pas identifikimit nga Policia e Vlorës të automjetit me të cilin ka lëvizur vrasësi ditën e krimit. Nga hetimi ka rezultuar se Mehmetaj ia ka dhënë automjetin para krimit autorit, teksa mjetit më pas i ishin ndërruar edhe targat.
Eris Mehmetaj i është sekuestruar edhe celulari, nga i cili grupi hetimor beson se do të marrë të dhëna që mund ta ndihmojnë për zbardhjen e vrasjes së Renato Hoxhajt.
Ai është me origjinë nga Tropoja, teksa pjesën më të madhe të kohës e kalonte në Dubai, ku reklamonte një jetë luksi në rrjetet sociale. Eris Mehmetaj njihet edhe si një mik Roan Brahimit alias Sidorel Prendit, i ekzekutuar në Maj të vitit të kaluar në Athinë, i cili strehohej në Dubai, teksa muajin e kluar i ekzektuan edhe të atin, Gjovalin Prendi në Lezhë.
Së fundmi ka dalë në media edhe një foto e Eris Mehmtajt me të ndjerin Roan Brahimi alias Sidorel Prendi, ku shfaqen krah njëri-tjetrit.
Vrasësi i Renato Hoxhajt është filmuar nga një kamer sigurie ranë vendit ku ndodhi atentati, ku ai shfaqet në momentin kur shkon mes rrugicave për të kryer krimin dhe momenti kur largohet sërish në të njëjtën rrugicë, teksa është i maskuar me kapele, maskë dhe doreza. Dyshohet se pasi ka kryer vrasjen e Renato Hoxhajt, ai është larguar drejt Greqisë përmes kufirit të gjelbër.
Grupi hetimor dyshon se vrasja e 58-vjeçarit është porositur nga Dubai, nga një grup kriminal nga Vlora, nën dyshimet se ai mund të ketë qenë informator për grupin kundërshtar.
Mediat raportojnë se viktima Renato Hoxhaj ka qenë komshi me Sokol Sinomatin, i njohur me nofkën “Buzëderri”, një prej personazheve më të njohur të krimit në Vlorë. Raportohet se 58-vjeçari ka qenë edhe roje i banesës së Sinomatit në lagjen “Hajro Çakërri”.
Një vit më parë Sokol Sinomatit i vranë të birin, Gëzim Sinomati me snajper, një atentat që u pasua nga ngjarje të tjera kriminale në qytetin e Vlorës dhe në Tiranë.
Renato Hoxhaj tani punonte si roje në një pallat, teksa u ekzekutua pranë banesës së tij, kur po kthehej në orët e para të mëngjesit të së dielës. Mbi Renato Hoxhajn autori qëlloi katër herë me armë zjarri pistoletë, ku 58-vjeçari mori dy plumba në trup dhe dy në kokë. Nga hetimet paraprake dyshohet se autori ka hyrë nga një rrugicë pas pallatit ku 58-vjeçari punonte, duke i dalë këtij të fundit përballë dhe më pas është larguar përsëri në rrugica.
Renato Hoxhaj jetonte i vetëm në shtëpi, teksa prej dy vitesh bashkëjetonte me një grua të komunitetit rom. Ai ishte babai i dy fëmijëve të rritur. Gruaja e tij e parë jetonte në Itali dhe shpesh fëmijët vinin për ta takuar.
