Korporata e Investimeve Shqiptare hapi për herë të tretë thirrjen e lidhur me kontratën “Zhvillimi nëpërmjet sipërmarrjes i LIFT Tower”, pjesë e nënprojektit “Ndërtimi dhe menaxhimi i godinës së Kadastrës Shqiptare”.
Si pjesë e nismës së qeverisë për të zhvilluar disa prona shtetërore përmes bashkëpunimit me privatin, interesi për këtë projekt është shfaqur i luhatur.
Në thirrjen e parë kur u duk se gjërat do të mbylleshin me sukses dhe dy kompani, konkretisht shoqëria “EDIL AL IT” sh.p.k. 2 dhe shoqëria “DK Construction ONE Corp” u kualifikuan për fazën e dytë, por në fund asnjëra prej tyre nuk paraqiti një ofertë konkrete.
Korporata komunikuar vendimin për anulimin e procedurës konkurruese të nisur më 20 Nëntor 2024 për përzgjedhjen e një Partneri Privat për zbatimin e kontratës “Zhvillimi nëpërmjet sipërmarrjes i LIFT Tower”.
“Arsyeja për anulim është: asnjë prej aplikantëve të ftuar nuk paraqiti ofertë për Fazën II të procedurës brenda afatit për dorëzimin e ofertave të përcaktuar në Ftesën për Ofertë” do të njoftonte Korporata në fund të afatit të thirrjes.
Pak ditë më pas sërish u shpall e njëjta thirrje. Edhe këtë herë dy kompani morën pjesë në sesionin informues: Shoqëria “EDIL AL IT” sh.p.k. dhe Shoqëria “Alko Impex” sh.p.k.
Në fund Korporata njoftoi se kishte anuluar për së dyti procedurën pasi aplikimi i paraqitur (ku nuk specifikohet cila prej kompanive e ka kryer atë) është i pavlefshëm.
“Arsyeja për anulim është: pavlefshmëria e aplikimit të paraqitur për Fazën I të procedurës konkurruese për shkak të pasaktësisë në plotësimin e Letrës së Aplikimit dhe formularëve të aplikimit sipas kërkesave të Dokumentit të Kualifikimit” thuhet në njoftim.
Tentativa e tretë për LIFT Tower
Tashmë subjektet private që duan të hyjnë në marrëdhënie me shtetin për të zhvilluar së bashku këtë pronë kanë afat deri më 30 maj për të bërë aplikimin sipas kërkesave që ka specifikuar Korporata në thirrjen e re.
“Korporata, nëpërmjet kësaj procedure konkurruese publike ndërkombëtare, synon të përzgjedhë partnerin privat, në cilësinë e Sipërmarrësit për zhvillimin e pronës për sipërmarrje, duke realizuar projekt-idenë arkitekturore të bashkimit të subjekteve Baukuh Studio Associato & Muoto & Sam Chermayeff Office & Yellow Office & Bollinger Grohmann & Atmoslab & Simoj Boudvin & Arkimade.
Procedura e konkurrimit për përzgjedhjen e Partnerit Privat do të kryhet nëpërmjet procedurës përzgjedhëse konkurruese me zarf, me dy faza, përkatësisht faza e kualifikimit dhe faza e përzgjedhjes, siç specifikohet në “Rregulloren e Procedurave Konkurruese”, të publikuar në faqen zyrtare të internetit të Korporatës.
Procedura është e hapur për të gjithë subjektet persona fizikë ose juridikë, privatë apo publikë, vendas apo të huaj” thuhet në thirrjen e Korporatës.
Ky konkurrim do të ketë dy faza, ku në të parën përzgjedhja lidhet me aplikantët që plotësojnë një sërë kushtesh kualifikimi të përcaktuara, kurse në të dytën vetëm pas ftesës për ofertë kandidatët paraqesin ofertën financiare ku kriteri bazë është që përqindja më e lartë e sipërfaqes përkatëse e ofruar për Korporatën në ndërtesën LIFT Tower mbi kriterin bazë që është 45%.
Prona ku do të zhvillohet LIFT Tower ndodhet te rruga “Muhamet Gjollesha”, pranë Fakultetit të Inxhinierisë së Ndërtimit, me një sipërfaqe rreth 2357 m².
